రేపు తెలంగాణకు బీజేపీ రాష్ట్ర వ్యవహారాల ఇంఛార్జీ తరుణ్ చుగ్ రానున్నారు. ఈ నేపథ్యంలో రేపు జరుగనున్న పార్టీ కోర్ కమిటీ, చేరికలపై సమన్వయ కమిటీ, ఫైనాన్స్ కమిటీ, ప్రజా సమస్యలు, టీఆర్‌ఎస్‌ వైఫల్యాలపై అధ్యయన కమిటీలతో సమావేశం నిర్వహించనున్నారు. రేపు ఉదయం 10 గంటలకు కోర్ కమిటీ తో భేటీ నిర్వహించి అనంతరం.. మధ్యాహ్నం 12 గంటలకు చేరికలపై సమన్వయ కమిటీతో తరుణ్ చుక్‌ సమావేశమవుతారు. ఒంటి గంటకు ఫైనాన్స్ కమిటీతో సమావేశం అనంతరం.. 2 గంటలకు ప్రజా సమస్యలు, టీఆర్‌ఎస్‌ వైఫల్యాలపై అధ్యయన కమిటీ లతో సమావేశం నిర్వహించనున్నారు.
అయితే ఇప్పటికే తెలంగాణపై దృష్టి సారించిన బీజేపీ.. 2024 ఎన్నికలే లక్ష్యంగా వ్యూహాలు చేస్తోంది. ఈ నేపథ్యంలోనే ఇటీవల బీజేపీ జాతీయ కార్యవర్గ సమావేశాలు హైదరాబాద్‌లో నిర్వహించారు. అంతేకాకుండా తెలంగాణలోని అన్ని నియోజకవర్గాల్లో బీజేపీ జాతీయ నాయకులు పర్యటించారు. అక్కడి ప్రజలతో ముచ్చటించారు. అంతేకాకుండా 2024లో తెలంగాణలో కాషాయ జెండా ఎగరం ఖాయమని బీజేపీ జాతీయ కార్యవర్గ సమావేశాల అనంతరం నిర్వహించిన సభలో బీజేపీ కేంద్రమంత్రులు వ్యాఖ్యానించారు.
