పేదలకు రెండు పడక గదుల ఇళ్లు పంపిణీ చేయాలంటూ బీజేపీ పోరాటాన్ని మరింత ముమ్మరం చేసింది. అందులో భాగంగా రేపు ఇందిరాపార్క్ వేదికగా ఆ పార్టీ ధర్నా చేపట్టనుంది. అయితే రేపటి ధర్నాకు పోలీసులు అనుమతి నిరాకరించారు. ఇందిరాపార్క్ వద్ద బీజేపీ ధర్నాకు పోలీసులు అనుమతివ్వకపోవడంతో ఆ పార్టీ శ్రేణులు హైకోర్టును ఆశ్రయించాయి. హైకోర్టులో బీజేపీ నేతలు లంచ్ మోషన్ పిటిషన్ దాఖలు చేశారు. ఈ పిటిషన్ను ఇవాళ మధ్యాహ్నం 2.30 గంటల తర్వాత విచారణ చేపడతామని హైకోర్టు తెలిపింది.
మరోవైపు.. రెండు పడక గదుల ఇళ్ల కోసం రేపు ఇందిరా పార్క్ వద్ద ధర్నా తలపెట్టిన బీజేపీ.. ఆ ధర్నా విజయవంతం కోసం పార్టీ కార్యాలయంలో.. హైదరాబాద్, రంగారెడ్డి, మేడ్చల్ మల్కాజిగిరి జిల్లాలకు చెందిన అధ్యక్షులు, జీహెచ్అఎంసీ కార్పొరేటర్లతో ఆదివారం రోజున సన్నాహక సమావేశం నిర్వహించారు. ఆ సమావేశానికి హాజరైన రాష్ట్ర అధ్యక్షుడు కిషన్‌రెడ్డి… పేదలకు తక్షణమే పక్కాఇళ్లు పంపిణీ చేయాలని డిమాండ్‌ చేశారు. ప్రభుత్వం స్పందించకపోతే కమలదళం ఆధ్వర్యంలో పెద్ద ఎత్తున యుద్ధం చేస్తామని హెచ్చరించారు. పేదలంటే.. కేసీఆర్ కుటుంబానికి ఎందుకంత చిన్నచూపు అని ప్రశ్నించారు.
