తెలంగాణ కాంగ్రెస్ అభ్యర్థుల తొలి జాబితా విడుదల చేసింది. 55 మంది అభ్యర్థులను ప్రకటించింది కాంగ్రెస్ పార్టీ. ఈ తరుణంలోనే.. సీనియర్ నేత నాగం జనార్దన్ రెడ్డికి కాంగ్రెస్ జలక్ ఇచ్చింది. ఆయన స్థానంలో నాగర్ కర్నూల్ అభ్యర్థిగా కూచుకుల్ల రాజేష్ రెడ్డికి పార్టీ అధిష్టానం టికెట్ కేటాయించింది. మరో సీనియర్ నేత కుందూరు జానరెడ్డి ఆశిస్తున్న మిర్యాలగూడ సీటును పెండింగ్ లో ఉంచింది. ఈ సీటును వామపక్షాలకు కేటాయించే అవకాశం ఉన్నట్లు తెలుస్తోంది.
కాగా, ఇటీవలే ఇతర పార్టీల నుంచి చేరిన 11 మందికి తొలి జాబితాలోనే టికెట్ కేటాయించడం విశేషం. కాగా, కాంగ్రెస్ ప్రకటించిన 55 మందిలో 12 మంది కొత్త అభ్యర్థులు ఉన్నారు. సీపీఎం అడిగిన భద్రాచలంలో పొదెం వీరయ్యకు టికెట్ ఇచ్చారు. ఇటీవల పార్టీలో చేరిన వేములకు నకిరేకల్ టికెట్ ఇచ్చింది కాంగ్రెస్ పార్టీ. మైనంపల్లి కుటుంబంలో ఇద్దరికి సీట్లు ఇచ్చింది కాంగ్రెస్ పార్టీ. నాగార్జునసాగర్ నుంచి జానారెడ్డి కుమారుడు జయవీర్ కు టికెట్ ఇచ్చింది.
