ఇండియన్ ముజాహిదీన్ తీవ్రవాది, హైదరాబాద్తో పాటు దేశంలోని వివిధ నగరాల్లో వరుస బాంబు పేలుళ్ల వెనక ఉన్న మాస్టర్ మైండ్ సయ్యద్ మఖ్బూల్(52) అనారోగ్యంతో మృతి చెందాడు. చర్లపల్లి జైల్లో ప్రస్తుతం శిక్ష అనుభవిస్తున్న సయ్యద్ గత కొన్ని రోజులుగా అనారోగ్యంతో బాధపడుతుండగా.. నెల రోజుల క్రితం గుండె ఆపరేషన్ జరిగింది. ఆ తర్వాత మూత్రపిండాలు విఫలమై ఆరోగ్యం క్షీణించడం, రెండు రోజుల క్రితం పల్స్ పడిపోవడంతో జైలు అధికారులు గాంధీ ఆసుపత్రికి తరలించగా.. చికిత్స పొందుతున్న టెర్రరిస్ట్ సయ్యద్ గురువారం మరణించాడు.
ఈ టెర్రరిస్ట్ స్వస్థలం మహారాష్ట్రలోని నాందేడ్. ఉగ్రసంస్థ ఇండియన్ ముజాహిదీన్ వ్యవస్థాపకుడు ఆజం ఘోరీకి అత్యంత సన్నిహితుడిగా సయ్యద్ మఖ్బూల్కు పేరుంది. యాసిన్ భత్కల్ సహా మరికొందరితో కలిసి హైదరాబాద్ సహా దేశవ్యాప్తంగా వివిధ నగరాల్లో పేలుళ్ల వెనుక సూత్రధారి అని ఇతడిపై అభియోగాలు ఉన్నాయి. 2006లో వారణాసి, 2007లో ముంబయి వరుస పేలుళ్లు, 2008లో జైపుర, 2008లో దిల్లీ, అహ్మదాబాద్, బెంగళూరుతో పాటు హైదరాబాద్ దిల్సుఖ్నగర్ పేలుళ్ల వెనుక ఇతని పాత్ర ఉన్నట్లు ఎన్ఐఏ ప్రస్తావించింది.
