తెలంగాణ ప్ర‌ణాళిక సంఘం ఉపాధ్యాక్షుడిగా మాజీ మంత్రి జి చిన్నారెడ్డి నియామ‌కం అయ్యారు. ఈ మేర‌కు రాష్ట్ర ప్ర‌భుత్వం ఉత్త‌ర్వులు జారీ చేసింది. ప్ర‌ణాళిక సంఘం ఉపాధ్యాక్షుడిగా నియాక‌మైన చిన్నారెడ్డి కేబినెట్ హోదాను క‌లిగి ఉండ‌నున్నారు. ఇటీవ‌ల జ‌రిగిన అసెంబ్లీ ఎన్నిక‌ల్లో వ‌న‌ప‌ర్తి నియోజ‌క‌వ‌ర్గం నుంచి చిన్నారెడ్డి పేరును కాంగ్రెస్ పార్టీ ప్ర‌క‌టించింది. కానీ అంత‌లోనే చిన్నారెడ్డి పేరును తొల‌గిస్తూ మేఘా రెడ్డికి కాంగ్రెస్ పార్టీ అవ‌కాశం క‌ల్పించింది. మేఘా రెడ్డి.. నిరంజ‌న్ రెడ్డిపై భారీ మెజార్టీతో గెలుపొందారు.
జి చిన్నారెడ్డి వ‌న‌ప‌ర్తి నియోజ‌క‌వ‌ర్గం నుంచి మూడుసార్లు ఎమ్మెల్యేగా గెలుపొందారు. 1985లో యువ‌జ‌న కాంగ్రెస్ నేత‌గా ఉన్న చిన్నారెడ్డి.. వ‌న‌ప‌ర్తి నియోజకవర్గంలో పోటీ చేసి టీడీపీ అభ్య‌ర్థి బాల‌కృష్ణ‌య్య చేతిలో ఓట‌మి పాల‌య్యారు. 1989లో మ‌ళ్లీ పోటీ చేసి బాల‌కృష్ణ‌య్య‌పై విజ‌యం సాధించి, తొలిసారి శాస‌న‌స‌భ‌లో అడుగుపెట్టారు చిన్నారెడ్డి. 1994 ఎన్నిక‌ల్లో టీడీపీ అభ్య‌ర్థి రావుల చంద్ర‌శేఖ‌ర్ రెడ్డి చేతిలో ఓడిపోయారు. 1999 ఎన్నిక‌ల్లో రావుల చంద్ర‌శేఖ‌ర్ రెడ్డిపై చిన్నారెడ్డి 3,500 ఓట్ల మెజార్టీతో గెలుపొందారు. 2004 ఎన్నిక‌ల్లోనూ గెలుపొందారు. వైఎస్సార్ కేబినెట్‌లో గ్రామీణాభివృద్ధి శాఖ మంత్రిగా ప‌ని చేశారు. 2009 ఎన్నిక‌ల్లో రావుల చేతిలో ఓట‌మి పాల‌య్యారు చిన్నారెడ్డి. 2014 ఎన్నిక‌ల్లో చిన్నారెడ్డి గెలుపొందారు. మొత్తంగా నాలుగు సార్లు ఎమ్మెల్యేగా ఎన్నిక‌య్యారు చిన్నారెడ్డి. 2018 ఎన్నిక‌ల్లో నిరంజ‌న్ రెడ్డి చేతిలో ఓడిపోయారు.
