తెలంగాణ రాష్ట్రంలో మూడు నెలలుగా సాగు భూముల కొనుగోళ్లు తగ్గుముఖం పట్టాయి. ఈ నేపథ్యంలో రాష్ట్ర స్టాంపులు, రిజిస్ట్రేషన్ల శాఖకు రాబడి తగ్గింది. భూముల క్రయవిక్రయాలు నిలిచిపోవడంతో రాష్ట్ర ఖజానాకు ఆదాయం కాస్త మందగించింది. తెలంగాణ శాసనసభ ఎన్నికల కారణంగానే భూముల కొనుగోళ్లు నిలిచిపోయాయని నిపుణులు చెబుతున్నారు. గత అక్టోబర్లో ఎన్నికల నోటిఫికేషన్ వెలువడగా అప్పటి నుంచి భూముల క్రయవిక్రయాలపై ప్రభావం పడిందని అంటున్నారు.
ఈ నేపథ్యంలోనే గత సెప్టెంబరు, అక్టోబరు, నవంబరు నెలల్లో రాష్ట్ర స్టాంపులు, రిజిస్ట్రేషన్ల శాఖకు అనుకున్నంత మేర రాబడి రాలేదని అధికారులు చెప్పారు. ప్రస్తుత ఆర్థిక సంవత్సరానికి సంబంధించి గత ఏప్రిల్‌ నుంచి నవంబరు వరకు సుమారు 8 వేల 450 కోట్ల రాబడి నమోదయిందని తెలిపారు. గత ఆర్థిక సంవత్సరం ఇది 8 వేల 356 కోట్లుగా ఉన్నట్లు వెల్లడించారు. గత ఆర్థిక సంవత్సరంతో పోల్చితే ఈ సారి ఆదాయం పర్వాలేదనిపించినా అభివృద్ధి శాతం పరంగా చూస్తే మాత్రం ఇది స్వల్పమేనని నిపుణులు పేర్కొంటున్నారు. ఇక డిసెంబరు నుంచి మార్చిపై జరగబోయే క్రయవిక్రయాలపైనే ఆశలు ఉన్నట్లు తెలిపారు.
