రాష్ట్ర వ్యాప్తంగా ఇవాళ బక్రీద్ పండుగను ముస్లిం ప్రజలు ఘనంగా జరుపుకోనున్నారు. ఈ క్రమంలోనే రాష్ట్రంలోని ఈద్గాలు ఇవాళ ప్రజలతో కిటకిటలాడనున్నాయి. ఈద్గాల వద్ద పోలీసులు పటిష్ఠ బందోబస్తు ఏర్పాటు చేశారు. ముఖ్యంగా హైదరాబాద్ నగరంలోని మసీదులు, ఈద్గాలు, ప్రార్థనా మందిరాల వద్ద గట్టి పహారా ఏర్పాటు చేశారు. మరోవైపు బక్రీద్ సందర్భంగా ఇవాళ హైదరాబాద్లో ట్రాఫిక్ ఆంక్షలు అమల్లో ఉండనున్నట్లు ట్రాఫిక్ పోలీసులు తెలిపారు. ముఖ్యంగా ఓల్డ్ సిటీలోని పలు ప్రాంతాల్లో ట్రాఫిక్ ఆంక్షలు విధించారు. ఈరోజు ఉదయం 8 గంటల నుంచి 11.30 గంటల వరకు ఆంక్షలు అమల్లో ఉండనున్నట్లు తెలిపారు.
ఈ మార్గాల్లో ట్రాఫిక్ ఆంక్షలు..
- పురానాపూల్‌, కామాటిపురా, కిషన్‌బాగ్‌ వైపు నుంచి ఈద్గాకు ప్రార్థనల కోసం వచ్చే వారు బహదూర్‌పురా ఎక్స్‌ రోడ్డు మీదుగా ఉదయం 8 నుంచి 11.30 గంటల మధ్య ఈ రూట్లలో అనుమతిస్తారు.
- శివరాంపల్లి, ధనమ్మ హట్స్‌ వైపు నుంచి ప్రార్థనల కోసం వచ్చే అన్ని వాహనాలను ధనమ్మ హట్స్‌ రోడ్డు నుంచి ఉదయం 8 నుంచి 11.30 గంటల వరకు అనుమతిస్తారు.
- ఉదయం 8 నుంచి 11.30 గంటల వరకు శంషాబాద్‌, రాజేంద్రనగర్‌ వైపు నుంచి బహదూర్‌పురా వైపు వచ్చే వాహనాలను అరాంఘర్‌ జంక్షన్‌ వద్ద నుంచి మళ్లిస్తారు.
- కాలాపత్తర్‌ నుంచి ఈద్గాకు వచ్చే వాహనాలను కాలాపత్తర్‌ ఠాణా వైపు నుంచి ఉదయం 8 నుంచి 11.30 గంటల వరకు అనుమతిస్తారు.
