టీఎస్పీఎస్సీ ప్రశ్నాపత్రం లీకేజీ కేసులో పోలీసులు కూపీ లాగుతుంటే డొంక కదులుతోంది. విచారణ చేపడుతున్న పోలీసులకు విస్తుపోయే విషయాలు వెలుగులోకి వస్తున్నాయి. ఇప్పటిదాకా ఒక్క పేపర్ మాత్రమే లీక్ అయిందనుకున్న పోలీసులకు షాకింగ్ విషయాలు తెలుస్తున్నాయి. ఏఈ పేపర్ కూడా లీక్ అయినట్లు పోలీసుల దర్యాప్తులో వెల్లడైంది. ఇక తాజాగా మరో సంచలనం విషయం బయటకు వచ్చింది.
ఈ కేసులో ప్రధాన నిందితుడిగా ఉన్న ప్రవీణఅ గ్రూప్ 1 ప్రిలిమ్స్ పరీక్ష రాసినట్లు పోలీసుల విచారణలో వెల్లడైంది. ఈ పరీక్షలో ప్రవీణ్‌కు 103 మార్కులు వచ్చినట్లు తెలిసింది. గ్రూప్ 1 ప్రిలిమ్స్‌ను ప్రవీణ్ లీక్ చేసి ఉండొచ్చని పోలీసులు అనుమానిస్తున్నారు. 150కు 103 మార్కులు వచ్చే ప్రతిభ ప్రవీణ్‌కు ఉందా అనే కోణంలో ఆరా తీస్తున్నారు.
గ్రూప్ 1 ప్రిలిమ్స్ పేపర్ వచ్చిన సర్వర్‌ను సైబర్ నిపుణులు పరిశీలిస్తున్నారు. గ్రూప్ 1 పేపర్ లీక్ అయిందా లేదా అని నిపుణులు పరిశీలిస్తున్నారు. ఈ నేపథ్యంలో పేపర్ లీక్ అయిన పరీక్షలను రద్దు చేసే యోచనలో టీఎస్పీఎస్సీ ఉన్నట్లు తెలుస్తోంది.
