దావోస్‌లో జరుగుతున్న 54వ ‘ప్రపంచ ఆర్థిక వేదిక’ సదస్సులో తెలంగాణకు ఓ సూపర్ ఛాన్స్ దక్కింది. ఈ వేదిక ఆధ్వర్యంలో ‘సెంటర్‌ ఫర్‌ ఫోర్త్‌ ఇండస్ట్రియల్‌ రివల్యూషన్‌(సీ4ఐఆర్‌)’ను హైదరాబాద్‌లో ఏర్పాటు చేసేందుకు ఒప్పందం కుదిరింది. బయో ఏషియా-2024 సదస్సులో భాగంగా ఫిబ్రవరి 28వ తేదీన ఈ కేంద్రాన్ని ప్రారంభించనున్నారు.
దావోస్‌లో ప్రపంచ ఆర్థిక వేదిక వార్షిక సదస్సు అధ్యక్షుడు బర్గె బ్రెండ్‌ ప్రతినిధి బృందంతో చర్చలు జరిపిన అనంతరం ముఖ్యమంత్రి ఎ.రేవంత్‌రెడ్డి బృందం ఈ విషయాన్ని సంయుక్తంగా ప్రకటించారు. జీవ వైద్య రంగంలో అత్యాధునిక సాంకేతికతను అభివృద్ధి చేయాలనే లక్ష్యంతో తెలంగాణలో ఈ కేంద్రాన్ని నెలకొల్పనున్నట్లు బర్గె బ్రెండ్‌ తెలిపారు. దీనికి ప్రపంచ ఆర్థిక వేదిక పరిపూర్ణ సహకారాన్ని అందిస్తుందని వెల్లడించనున్నారు.
దీనిపై సీఎం రేవంత్ రెడ్డి స్పంది్సతూ రాష్ట్రంలో ఆరోగ్య సంరక్షణ మెరుగుదలకు సాంకేతిక ఆధారిత కార్యక్రమం రూపకల్పనలో ఈ కేంద్రం ద్వారా మార్గం సుగమమైందని అన్నారు. ప్రపంచ ఆర్థిక వేదిక విశాల దృక్పథం, నిర్దేశించుకున్న లక్ష్యాలన్నీ తెలంగాణ ప్రభుత్వ ఆలోచనలకు అనుగుణంగా ఉన్నాయని అందుకే రెండింటి మధ్య అద్భుతమైన సమన్వయం కుదిరిందని చెప్పారు.
