పెళ్లికాని అమ్మాయిలు ఫోన్ వాడటానికి అనుమతి ఇవ్వంద్దంటూ ఓ వింత నిబంధన పెట్టారు గుజరాత్లోని ఠాకోర్ సమాజ్ సభ్యులు. బనాస్కాంఠ జిల్లాలోని భాభార్ తాలూకాలోని లున్‌సేలాలో జరిగిన సంత్‌ శ్రీ సదరమ్ బాపా విగ్రహ ప్రతిష్ఠాపన మహోత్సవంలో ఈ నిర్ణయం తీసుకున్నారు. దీంతోపాటు మొత్తం 11 ఈ సంస్కరణలు రూపొందించారు. తమ కమ్యూనిటీ ప్రజలు ఈ నిబంధనలకు కట్టుబడి ఉండాలని పిలుపునిచ్చారు. అనంతరం ఈ 11 నియమాలను అందరూ పాటించాలని శపథం చేశారు.
ఇంతకీ ఆ 11 నియమాలేంటంటే..?
- వివాహాలలో డీజేలపై పూర్తి నిషేధం.
- పెళ్లిలో బహుమతులకు బదులుగా నగదు ఇచ్చుకోవాలి.
- పెళ్లికి వరుడు, వధువు రోజువారీ జీవితంలో ఉపయోగించే వస్తువులను మాత్రమే బహుమతిగా ఇవ్వాలి.
- నిశ్చితార్థానికి 11 మంది అతిథులు మాత్రమే హాజరు అవ్వాలి.
- వివాహా కార్యక్రమానికి 51 మంది అతిథులు మాత్రమే హాజరు కావాలి.
- సామాజిక వర్గాల వారీగా కమ్యూనిటీ వివాహాలు నిర్వహించాలి.
- నూతన వధూవరులు.. బంధువుల ఇంటిని సందర్శించినప్పుడు వారికి డబ్బును ఇవ్వకూడదు.
- నిశ్చితార్థం, వివాహాన్ని రద్దు చేసినందుకు శిక్షలు విధించకూడదు.
- పెళ్లికాని అమ్మాయిలకు మొబైల్ ఫోన్ను ఉపయోగించడానికి అనుమతి ఇవ్వకూడదు.
- మత్తు పదార్థాలకు బానిసలైన వారి కోసం డీ-అడిక్షన్ క్యాంపులు ఏర్పాటు చేయాలి.
- ప్రతి గ్రామంలోని ప్రజలు చదువుకోవడానికి వెళ్లే బాలికలకు రాకపోకలకు ఇబ్బంది లేకుండా ప్రత్యేక ఏర్పాట్లు చేయాలి.
