గద్ద రెక్కల కింద కోడిపిల్లలు అంటూ కేసీఆర్ సభపై విజయశాంతి సంచలన వ్యాఖ్యలు చేశారు. సీఎం కేసీఆర్ గారూ… మీ ఎన్నికల ప్రసంగం కన్నా అవాస్తవాలు ఎక్కడైనా ఉంటాయా ? అని ప్రశ్నించారు. కరెంట్ మీటర్ల అంశం మీ నిరంతర మాటల మోసం… చేనేత కార్మికులపై మీరు మాట్లాడినది వాస్తవదూరమని పేర్కొన్నారు.
ఇక ఎమ్మెల్యేల కొనుగోలుపై నేను చెప్తున్నట్లుగానే అది బీజేపీకి సంబంధం లేని వ్యవహారం. మీరు కుట్ర చేసి నడిపించబట్టే… ఆ నలుగురు ఎమ్మెల్యేలను బయటకు వదిలే ధైర్యం లేక… కోడి పిల్లలను బుట్టల పెట్టినట్లు ప్రగతి భవన్‌ల దాయబెట్టి ప్రజలను ధోకా చేస్తున్నారని ఆగ్రహించారు.
ఆ నలుగురు ఎమ్మెల్యేలలో ఒకరు సంఘటన జరిగిన నాడు… “మేమంతా కేసిఆర్ గారు చెప్పినట్టే చేసినం…” అని ప్రెస్ ముందు చేసిన ఒక కామెంట్ తర్వాతనే మీరు ఈ ఎమ్మెల్యేల హోస్టేజ్ సన్నివేశం చేసింది నిజం కాదా?… నిజాయితీపరులు అని మీరే చెబుతున్న ఆ నలుగురు ఎమ్మెల్యేలనూ నాలుగు రోజుల నుండీ నిర్బంధించవలసిన అగత్యం ఏంటి? వారు నిజం బయట పెడతారనేనా? ఎన్నికలలోపు వారు ప్రగతిభవన్ కట్టడి నుండి బయటకు రాగలిగిన అవకాశం ఇంతకూ మీ నియంతృత్వ గడీల పాలనలో ఉందా లేదా? అని పేర్కొన్నారు విజయశాంతి.
