ఆంధ్రప్రదేశ్ ముఖ్యమంత్రిగా వైఎస్ జగన్ అధికారంలోకి వచ్చిన తర్వాత రాష్ట్రంలో రంగుల పై వివాదం తీవ్ర స్థాయిలో చెలరేగింది. ఆ భవనం ఈ భవనం అనే తేడా లేకుండా రంగులు వేసింది రాష్ట్ర ప్రభుత్వం. ఇది మంచి పద్ధతి కాదని రంగులు తొలగించాలని విపక్షాలు డిమాండ్ చేసినా సరే జగన్ సర్కార్ మాత్రం మారలేదు. ఇక ఈ విషయంలో హైకోర్ట్ ఏపీ సర్కార్ కి పెద్ద షాక్ ఇచ్చింది.
రంగులను తొలగించాలని హైకోర్ట్ ఆదేశాలు ఇచ్చినా సరే వైసీపీ సర్కార్ సుప్రీం కోర్ట్ కి వెళ్ళింది. ఆ వివాదం పూర్తి కాక ముందే తాజాగా మరోసారి వైసీపీ రంగులు కనిపించాయి. ఆంధ్రప్రదేశ్‌లోని చిత్తూరు జిల్లాలో ఉన్న ఓ శివాలయం ప్రాంగణంలో ఉన్న భవనానికి వైసీపీ రంగులు వేసారు. చిత్తూరు జిల్లా ఐరాల మండలం చుక్కావారిపల్లి క్రాస్‌ రోడ్డు వద్ద శ్రీ అర్ధనారీశ్వరాలయ ప్రాంగణంలో ఒక చిన్న కార్యాలయం ఉండగా…
ఆ కార్యాలయానికి వైసీపీకి సంబంధించిన రంగులు వేసారు. వేదగిరివారిపల్లి గుండ్లపల్లి పంచాయతీలతోపాటు దామలచెరువు గ్రామాల ప్రజలు ఇక్కడి స్వామివారికి పూజలు నిర్వహిస్తారు. గర్భాలయానికి అనుబంధంగా ఓ దాత నిర్మించి ఇచ్చిన గదికి స్థానిక వైసీపీ నేతలు రెండు రోజుల క్రితం రంగులు వేయడం… దీన్ని రైతు భరోసా కేంద్రంగా మార్చడం జరిగింది. దీనిపై స్థానికులు ఆగ్రహం వ్యక్తం చేస్తున్నారు.
