భారత్, పాక్ సరిహద్దుల్లో మరోసారి అలజడి రేగింది. జమ్మూ కాశ్మీర్ లోని పూచ్ జిల్లాలోని మేంధర్ సెక్టార్ లోని లైన్ ఆఫ్ కంట్రోల్ (ఎల్‌ఓసి) సమీపంలో ఆదివారం ఉదయం ఎగిరే వస్తువు ఒకటి కనిపించింది. ఈ వస్తువు భారత భూభాగంపై ఎగురుతూ కనిపించింది. అయితే, ఆ వస్తువు డ్రోనా లేక మరొకటా అనేది ఇంకా స్పష్టంగా తెలియలేదు. ఇది ఏంటీ అనే దానిని గుర్తించడానికి భారత ఆర్మీ ప్రయత్నిస్తుంది.
గత నెలలో, జమ్మూ కాశ్మీర్ కేరన్ సెక్టార్ లో నియంత్రణ రేఖ వెంట పాకిస్తాన్ ఆర్మీ క్వాడ్కాప్టర్ను భారత సైన్యం పేల్చేసిన సంగతి తెలిసిందే. చైనాకు చెందిన డీజేఐ మావిక్ 2 ప్రో మోడల్ తయారుచేసిన పాకిస్తాన్ క్వాడ్‌కాప్టర్ భారత భూభాగం మీదుగా ఎగురుతున్నప్పుడు కాల్చేశారు. కాగా సరిహద్దుల్లో పాకిస్తాన్ ఇటీవల వరుస కాల్పులకు దిగుతున్న సంగతి విదితమే.
