ఉత్తర్ ప్రదేశ్ లోని ఆగ్రా జిల్లా మన్ కేఢా గ్రామంలో రెండు మూడ్రోజులకోసారి పాము వచ్చి ఒకే యువకుడిని కాటేయడం వెనుక మిస్టరీ వీడలేదు. ఆ పాము ఆ యువకుడు రజత్ చాహర్(20)ని ఇంకా వెంటాడుతూనే ఉంది. గత వారం రోజుల్లో మరో మూడుసార్లు అతడిని పాము కాటేసింది. దీంతో మొత్తం గత 15 రోజుల్లో 8సార్లు పాము కాటుకు గురయ్యాడు.
అసలు ఆ పాము అతడ్ని ఎందుకు వెంటాడుతోందో, ప్రతిసారీ ఎడమ కాలిపైనే కాటేయడానికి కారణమేంటో తెలియక కుటుంబ సభ్యులు ఆందోళన చెందుతున్నారు. పాముకి భయపడి అసలు తాను బయటకు వెళ్లడం లేదని చెప్పాడు బాధితుడు.
“ఏడాది క్రితం నా సోదరుడు ఓ పామును చంపాడు. అప్పుడు నేను నొయిడాలో ఉన్నాడు. నాగదేవత పగ తీర్చుకోవాలని అనుకుంటే.. నా వెనుక ఎందుకు పడింది? అసలు ఇలా ఎందుకు జరుగుతుందో నాకు అర్థం కావడం లేదు” అని ఆవేదన వ్యక్తం చేశాడు రజత్.
