విశాఖపట్టణం జిల్లా అరకు ఎంపీ గొడ్డేటి మాధవి త్వ‌ర‌లోనే ఓ ఇంటి కోడ‌లు అవుతోన్న సంగ‌తి తెలిసిందే. ఈ యేడాది ఏప్రిల్‌లో జ‌రిగిన ఎన్నిక‌ల్లో ఆమె అతి త‌క్కువ వ‌య‌స్సులోనే ఎంపీగా ఎన్నికై రికార్డు క్రియేట్ చేశారు. కేవ‌లం 25 ఏళ్ల 3 నెల‌ల‌కే ఆమె ఎంపీగా విజ‌యం సాధించారు. ఆమె తన చిన్ననాటి స్నేహితుడైన శివప్రసాద్‌ను ఈ నెల 17న మాధవి పెళ్లాడనున్నారు.
శివప్రసాద్ విద్యాసంస్థ‌ల కరస్పాండెంట్గా ఉన్న సంగ‌తి తెలిసిందే. గోలుగొండ మండలంలోని కేడీపేటకు చెందిన శివప్రసాద్ బీటెక్, ఎంబీఏ పూర్తిచేశారు. ప్రస్తుతం ఓ కాలేజీలో కరస్పాండెంట్గా పనిచేస్తున్నారు. మాధవి స్వగ్రామం అయిన కొయ్యూరు మండ‌లం శరభన్నపాలెంలో వైభవంగా వివాహం జరగనుండగా, విశాఖపట్టణంలోని రుషికొండ వద్ద ఉన్న ఓ రిసార్ట్‌లో రిసెప్షన్ జరగనుంది.
ప్రస్తుతం మాధవి ప్రీ వెడ్డింగ్ ఫొటో షూట్‌కు సంబంధించిన ఫొటోలు సోషల్ మీడియాలో వైరల్ అయ్యాయి. పెళ్లి డేట్ ద‌గ్గ‌ర ప‌డుతుండ‌డంతో మాధవి-శివప్రసాద్‌లు ప్రీవెడ్డింగ్ ఫొటో షూట్‌ చేయించుకున్నారు. ఈ సందర్భంగా తీసిన ఫొటోలు సోషల్ మీడియాలో వైరల్ అవుతున్నాయి. విశాఖ ఏజెన్సీలోని జ‌ల‌పాతాల ద‌గ్గ‌ర ఇద్ద‌రు ఎంజాయ్ చేస్తోన్న ఫొటోలు తీయించుకున్నారు.
ఇక మాధవి తండ్రి గొడ్డేటి దేముడు గతంలో ఎమ్మెల్యేగా పనిచేశారు. కమ్యూనిస్టు నేతగా మంచి గుర్తింపు సంపాదించుకున్న దేముడు వారసురాలిగా మాధవి వైసీపీ నుంచి తన రాజకీయ ప్రస్థానాన్ని ప్రారంభించారు.
