జార్జ్‌.. అది పేరు కాదు. ప్ర‌వ‌హించే ఉత్తేజం. విప్లవానికి మారుపేరు, ఉస్మానియా చేగువేరా, ఫిజిక్స్‌లో గోల్డ్‌ మెడలిస్ట్‌, బాక్సర్‌, విద్యార్థి నాయకుడు… ఇలా చెప్పుకుంటూపోతే పాతికేళ్లకే సంచలనం సృష్టించిన ‘జార్జిరెడ్డి’ జీవిత కథ ఆధారంగా ‘జార్జిరెడ్డి’ పేరుతో ఓ సినిమా తెరకెక్కుతున్న విషయం తెలిసిందే. అయితే సినిమాపై వివాదం నెలకొంది. విద్యార్థి నేత అయిన జార్జిరెడ్డి జీవితకథతో తెరకెక్కిన ఈ సినిమాపై ఏబీవీపీ అభ్యంతరాలను వ్యక్తం చేసింది.
ఈ చిత్రాన్ని నిషేధించాలని ఏబీవీపీ డిమాండ్ చేసింది. వందల మంది ప్రాణాలను పొట్టన పెట్టుకున్న వ్యక్తి జార్జిరెడ్డి అని ఆరోపించింది. సినిమాలో ఏబీవీపీని కించపరిచే సన్నివేశాలు ఉన్నాయని, ఆ చిత్రాన్ని అడ్డుకుంటామని హెచ్చరించింది. నిజానిజాలను సెన్సార్ బోర్డు పరిశీలించాలని ఏబీవీపీ తెలంగాణ రాష్ట్ర సెక్రటరీ శ్రీశైలం కోరారు. కాగా, ఈ నెల 22న ఈ చిత్రం విడుదలకానుంది.
