అమెరికా అధ్యక్షుడు జో బైడెన్‌కు చైనా అధ్యక్షుడు షీ జిన్పింగ్ నూతన సంవత్సర శుభాకాంక్షలు తెలిపారు. ఈ సందర్భంగా ఆయన బైడెన్తో పని చేసేందుకు సిద్ధంగా ఉన్నట్లు తెలిపారు. ఇరు దేశాల ప్రజల ప్రయోజనాల దృష్ట్యా ఈ నిర్ణయం తీసుకున్నట్లు వివరించారు. అంతే కాకుండా చైనా, అమెరికా సంబంధాలను బలోపేతం చేయడానికి, ప్రపంచశాంతి, అభివృద్ధి కోసం అమెరికాతో కలిసి పనిచేస్తామని ఉద్ఘాటించారు.
ఇరు దేశాల మధ్య దౌత్య సంబంధాలు నెలకొని 45 ఏళ్లు కావొస్తున్న తరుణంలో జిన్పింగ్ ఈ సందేశం ఇవ్వడం ఇప్పుడు చర్చనీయాంశమైంది. ఈ సంబంధాలు స్థిరంగా అభివృద్ధి చెందేందుకు ఇరు వైపులా చర్యలు తీసుకోవాలని జిన్పింగ్ ఈ సందర్భంగా బైడెన్ను కోరారు. పలు అంశాల్లో రెండు దేశాల మధ్య విభేదాలు నెలకొన్న తరుణంలో గతేడాది నవంబర్‌లో జిన్పింగ్ అమెరికాలో పర్యటించిన విషయం తెలిసిందే. ఈ పర్యటనలో బైడెన్తో భేటీ అయిన జిన్పింగ్ వాణిజ్యం, భౌగోళిక, రాజకీయ అంశాలపై చర్చించారు. ఉత్తరకొరియా అధ్యక్షుడు కిమ్‌జోంగ్‌ ఉన్‌కు కూడా జిన్పింగ్ కొత్త సంవత్సరం సందేశం పంపారు. 2024ను ఫ్రెండ్‌షిప్‌ ఇయర్‌గా కిమ్‌, జిన్‌పింగ్‌లు అభివర్ణించారు.
