రిజర్వేషన్ల పై అనుచిత వ్యాఖ్యలు చేశారన్న ఆరోపణలతో తెలంగాణ సీఎం రేవంత్ రెడ్డి పై కేసు నమోదు అయిన విషయం తెలిసిందే. అయితే ఈ కేసును నాంపల్లి ప్రజా ప్రతినిధుల కోర్టు ఇవాళ విచారించనుంది. రిజర్వేషన్లను తీసేసేందుకు బీజేపీ ప్రయత్నిస్తుందని.. గతంలో ఓ సభలో సీఎం రేవంత్ రెడ్డి మాట్లాడారు. బీజేపీ ప్రతిష్టకు భంగం కలిగేవిధంగా సీఎం రేవంత్ రెడ్డి మాట్లాడారని ఆ పార్టీ ప్రధాన కార్యదర్శి కాసం వెంకటేశ్వర్లు ప్రజా ప్రతినిధుల కోర్టును ఆశ్రయించారు.
దీంతో ప్రజా ప్రతినిధ్య చట్టంలోని 499, 125 సెక్షన్ల కింద రేవంత్ రెడ్డి పై కేసు నమోదు అయింది. ఆ కేసును ఇవాళ కోర్టు విచారించనుంది. మరోవైపు అక్టోబర్ 16న కోర్టులో హాజరు కావాలని సీఎం రేవంత్ రెడ్డికి నాంపల్లి కోర్టు నిన్న ఆదేశాలు జారీ చేసింది. నాంపల్లి కోర్టులో ఓటుకు నోటు ఈడీ కేసు విచారణ చేపట్టింది. అయితే ఈ విచారణకు మత్తయ్య మినహా మిగతా నిందితులందరూ గైర్హాజరు అయ్యారు. సీఎం రేవంత్ రెడ్డి, ఉదయ్ సింహా, వేం కృష్ణ కీర్తన్, సండ్ర వెంకట వీరయ్య, సెబాస్టియన్ గైర్హాజరు కావడంతో అక్టోబర్ 16న హాజరు కావాలని ఆదేశించింది కోర్టు.
