ఐకాన్ స్టార్ అల్లు అర్జున్, బ్యూటీఫుల్ భామ రష్మిక ప్రధాన పాత్రలో నటించిన సినిమా ‘పుష్ప’. ఈ చిత్రంలోని బన్నీ నటన, డైలాగ్స్, సాంగ్స్, సుకుమార్ టేకింగ్.. ఇలా ప్రతీది దేశవ్యాప్తంగా ప్రేక్షకులను విపరీతంగా ఆకట్టుకున్నాయి. ముఖ్యంగా సాంగ్స్ విడుదలయ్యాక ఆ స్టెప్పులను సెలెబ్రిటీలు సైతం రీక్రియెట్ చేస్తూ సోషల్ మీడియాలో పోస్ట్లు చేసి సందడి చేశారు. ఇక శ్రీవల్లి సాంగ్లో అల్లు అర్జున్ చెప్పు స్టెప్పు తెగ అలరించింది. బన్నీ గాగుల్స్ పెట్టుకుని చెప్పుల్ని ఈడ్చుతూ స్టెప్పు వేయడం, చెప్పు జారిపోతే దానిని సరి చేసుకోవడం అభిమానులను బాగా ఆకట్టుకుంది. సింపుల్గా అనిపించే ఈ స్టెప్కు సెలెబ్రిటీలు కూడా థ్రిల్ అయ్యారు. అయితే తాజాగా ఈ స్టెప్పుకు సంబంధించి ఓ సీక్రెట్ చెప్పారు బాలీవుడ్ బిగ్బీ అమితాబ్ బచ్చన్. కొరియోగ్రఫీలో భాగంగా బన్నీ అలా డ్యాన్స్ చేయలేదని.. చెప్పు జారిపోవడం మిస్టేక్గా జరిగిందని చెప్పారు.
ప్రస్తుతం కౌన్ బనేగా కరోడ్ పతి 14 సీజన్ ప్రారంభమైంది. ఈ షోలో పుష్ప గురించి ఓ ప్రశ్న వచ్చినప్పుడు.. అమితాబ్ బచ్చన్.. చెప్పు స్టెప్పు గురించి అసలు మ్యాటర్ లీక్ చేశారు. “ఓ చిత్ర షూటింగ్లో భాగంగా నేను హైదరాబాద్ వెళ్లాను. అప్పుడు అల్లు అర్జున్ స్టెప్ బాగా వైరల్ అవుతోంది. ‘కొరియోగ్రఫీలో భాగంగా బన్నీ ఇలా డ్యాన్స్ చేశారా లేదా అనుకోకుండా వేసిందా’ అని మా డైరెక్టర్తో అడిగాను. మా దర్శకుడు వివరాలు తెలుసుకుని అసలు విషయం చెప్పాడు. అల్లు అర్జున్ చెప్పు జారిపోవడం పొరపాటుగా జరిగింది. అది కొరియోగ్రఫీ కాదు. కానీ సుకుమార్కు అది నచ్చడంతో అలాగే ఉంచేశారట” అని బిగ్బీ చెప్పుకొచ్చారు. అలా అల్లు అర్జున్ పొరపాటుగా చేసిన చెప్పు స్టెప్ వైరల్గా మారింది.
కాగా, ‘చూపే బంగారమాయనే శ్రీవల్లి.. మాటే మాణిక్యమాయనే.. ‘ అంటూ ఆకట్టుకున్న ఈ సాంగ్లో పల్లెటూరి యువకుడిగా అల్లు అర్జున్.. పూర్తిగా ఒదిగిపోయి కనిపించారు. పల్లెటూరి యువతిగా రష్మిక లుక్స్‌ బాగా ఆకట్టుకోగా.. ఈ సాంగ్లో మరింత అమాయకంగా, అందంగా కనిపించి ఫ్యాన్స్ను ఫిదా చేసింది. ఎర్రచందనం స్మగ్లింగ్ నేపథ్యంలో తెరకెక్కిన ఈ సినిమాను మైత్రి మూవీ మేకర్స్ నిర్మించింది. రెండో భాగం త్వరలోనే సెట్స్పైకి వెళ్లనుంది.
