క్రేజీ మల్టీస్టారర్‌ ‘ఆర్‌ఆర్‌ఆర్‌’ భారీ వసూళ్లు సాధించటమే కాదు ఆస్కార్‌లోనూ నిలుస్తుందని చాలామంది తమ అభిప్రాయం వ్యక్తం చేశారు. గత కొద్దిరోజులుగా ఎక్కడ చూసినా ఇదే విషయం గురించి తెగు చర్చించుకున్నారు. దీంతో కచ్చితంగా ఈ సినిమా ఆస్కార్ రేసులో నిలుస్తుందని ఆశించారు. కానీ ఈ విషయంలో ఆర్ఆర్ఆర్కు నిరాశ ఎదురైంది. తాజాగా ప్రకటించిన భారత్ తరఫున అధికారిక ఎంట్రీగా గుజరాతీ సినిమా ‘ఛెల్లో షో’ ఎంపికైంది. ఈ మేరకు ఫిల్మ్ ఫెడరేషన్ ఆఫ్ ఇండియా ప్రకటించింది.
95వ ఆస్కార్ అవార్డుల పోటీలకు ఛెల్లో షోను ఎంపిక చేసినట్లు ఫిల్మ్ ఫెడరేషన్ ఆఫ్ ఇండియా సెక్రెటరీ జనరల్ సుప్రాన్ సేన్ వెల్లడించారు. ఇంగ్లిష్లో ‘లాస్ట్ ఫిల్మ్ షో’గా పిలుస్తున్న ఈ చిత్రానికి పాన్ నలిన్ దర్శకత్వం వహించాడు. 2021 అక్టోబర్ 14వ తేదీన దేశవ్యాప్తంగా విడుదలైంది. రాయ్ కపూర్ ఫిల్మ్స్ బ్యానర్పై సిద్ధార్థ్ రాయ్ కపూర్ నిర్మించారు. జుగాడ్ మోషన్ పిక్చర్స్, మాన్సూన్ ఫిల్మ్స్, ఛెల్లో షో ఎల్ఎల్పీ, మార్క్ దువాలే సైతం నిర్మాణంలో భాగమయ్యారు.
