టాలీవుడ్ మెగా పవర్ స్టార్ రామ్ చరణ్..‘‘ట్రిపుల్ ఆర్’’…సినిమాతో పాన్ ఇండియా స్టార్ అయిపోయారు. దేశవ్యాప్తంగా చరణ్ కు విపరీతమైన క్రేజ్ ఏర్పడింది. ఫ్యాన్ ఫాలోయింగ్ కూడా బాగా పెరిగింది. కానీ, ఆ తర్వాతనే విడుదలైన ‘ఆచార్య’ సినిమా మాత్రం అట్టర్ ఫ్లాప్ అయింది. ఆ సినిమా స్టోరి, మేకింగ్ పైన భారీ అంచనాలు ఉండగా, చివరికి నిరాశే మిగిలింది.
రామ్ చరణ్ ప్రస్తుతం ఇండియన్ జీనియస్ డైరెక్టర్ శంకర్ దర్శకత్వంలో RC15 ఫిల్మ్ చేస్తు్న్నారు. ఈ చిత్రానికి ‘అధికారి’, ‘సర్కారోడు’ అనే టైటిల్స్ ను పరిశీలిస్తున్నట్లు తెలుస్తోంది. కాగా, ఈ చిత్రంలోనూ మెగా పవర్ స్టార్ రామ్ చరణ్ రిస్క్ చేస్తున్నారనే వార్తలు సోషల్ మీడియాలో వస్తున్నాయి. ఆ న్యూస్ ప్రకారం..రామ్ చరణ్ ఈ చిత్రంలో ట్రిపుల్ రోల్ ప్లే చేస్తున్నాడట. తండ్రి పాత్రతో పాటు ఇద్దరు కొడుకుల పాత్రలను రామ్ చరణ్ పోషిస్తున్నారని సమచారం.
కమల్ హాసన్ ‘భారతీయుడు’ సినిమాలో మాదిరిగా తండ్రి పాత్ర ఉంటుందని టాక్. అయితే, ఈ చిత్రంలో తండ్రి పొలిటీషియన్. కాగా, ఇద్దరు కొడుకుల్లో ఒకరు ఆవేశపరుడుగా, మరొకరు శాంతమూర్తిగా కనిపిస్తారని వినికిడి. ఈ విషయం తెలుసుకుని మెగా అభిమానులు ఆందోళన చెందుతున్నారు. గతంలో హీరోలు త్రిపాత్రాభినయం చేసిన సినిమాలు అంతంత మాత్రంగానే ఆడాయని, ఈ క్రమంలోనే రామ్ చరణ్ ఈ సినిమా కూడా బాక్సాఫీసు వద్ద బోల్తా కొడుతుందా? అని అనుమానాలు వ్యక్తం చేస్తున్నారు.
చిరంజీవి, కృష్ణ, జూనియర్ ఎన్టీఆర్ వంటి వారు త్రిపాత్రాభినయం చేసిన చిత్రాలు బాక్సాఫీసు వద్ద అనుకున్న స్థాయిలో ఆడలేదు. ఈ క్రమంలోనే సేమ్ సెంటిమెంట్ రామ్ చరణ్ కు రిపీట్ అవుతుందా? లేదా శంకర్ మ్యాజిక్ వర్కవుట్ అవుతుందా? అని చర్చించుకుంటున్నారు. కార్తీక్ సుబ్బరాజ్ ఈ చిత్రానికి స్టోరి అందించగా, ఎస్.ఎస్.థమన్ మ్యూజిక్ అందిస్తున్నారు. టాలీవుడ్ స్టార్ ప్రొడ్యూసర్ దిల్ రాజు సినిమాను ప్రొడ్యూస్ చేస్తుండగా, రామ్ చరణ్ కు జోడీగా కియారా అద్వానీ నటిస్తోంది. శ్రీకాంత్, అంజలి, సునీల్ కీలక పాత్రలు పోషిస్తున్నారు.
