ఏంటి రానా.. ఇంత సన్నగయ్యావ్!

రానా దగ్గుబాటి.. బాహుబలిలో భళ్లాలదేవగా మెప్పించిన ఆ రానాయే. చూడండి.. పైన ఫోటోలో ఎంత సన్నగా అయ్యాడో. షాకయ్యారా? అయితే.. ఆయన సన్నగా అయింది ఎందుకో తెలుసా. ఎన్టీఆర్ సినిమా కోసం. అవును.. బాలకృష్ణ, విద్యాబాలన్ ప్రధాన పాత్రల్లో నటిస్తున్న ఎన్టీఆర్ సినిమా కోసం అంతలా సన్నపడ్డాడన్నమాట. సీనియర్ ఎన్టీఆర్ జీవిత కథ ఆధారంగా ఈ సినిమా తెరకెక్కుతున్నది. క్రిష్ డైరెక్టర్. రానాతో పాటు రకుల్ ప్రీత్ సింగ్, ప్రకాశ్ రాజ్, మురళి శర్మ తదితరులు కీలక పాత్రల్లో నటిస్తున్నారు.

రానా దగ్గుబాటి ఏపీ ముఖ్యమంత్రి చంద్రబాబు పాత్రను పోషిస్తున్నాడు. చంద్రబాబులా ఉండాలన్న ఉద్దేశంతో కాసింత సన్నగా అయ్యాడు రానా. కొన్ని రోజుల క్రితమే రానా సీన్స్‌ను చిత్రీకరించడం ప్రారంభించిందట మూవీ యూనిట్. షూటింగ్ సమయంలో ఎవరో రానా ఫోటోలను కెమెరాల్లో బంధించి సోషల్ మీడియాలో పోస్ట్ చేశారు. ఇప్పుడు వైరల్ అవుతున్న ఫోటోలు అవే.

ఈ సినిమాలో శ్రీదేవి పాత్రలో రకుల్ ప్రీత్ సింగ్, హరికృష్ణ పాత్రలో కళ్యాణ్ రామ్, అక్కినేని నాగేశ్వరరావు పాత్రలో సుమంత్, సావిత్రిగా కీర్తి సురేశ్ నటించనున్నట్లు తెలుస్తోంది.