ఓ సినిమా బంపర్‌ హిట్టు కొట్టిందంటే చాలు అలాంటి సినిమా మళ్లీ ఎప్పుడని అడుగుతారు సినీజనం. ప్రేక్షకుల మనసులను, కలెక్షన్లనూ గెలుచుకున్న సినిమా అంటే ఓ సక్సెస్‌ ఫార్ములా దొరికినట్లే. అలాంటి సూపర్ హిట్ చిత్రాలకు కొనసాగింపు తీయడమే సీక్వెల్. మన దగ్గర వీటి ధోరణి తక్కువే కానీ హాలీవుడ్‌లో సంవత్సరం పొడుగునా సీక్వెల్స్, ఫ్రాంఛైజీలు అభిమానులను పలకరిస్తూనే ఉంటాయి. ఆ తర్వాత సీక్వెల్స్, ఫ్రాంఛైజీల విషయంలో సినీప్రియుల్ని బాగా ఆకట్టుకుంది బాలీవుడ్. క్రిష్, గోల్మాల్, ధూమ్, హౌస్ఫుల్ వంటి ఫ్రాంచైజీలే వీటికి నిదర్శనం. అయితే ఈ సీక్వెల్ ఫార్ములా మెలమెల్లగా సౌత్కు పాకింది. కానీ అంతగా వర్కౌట్ అవ్వలేదు. తెలుగులో సాయి కుమార్ నుంచి మెగాస్టార్ చిరంజీవి, బాలకృష్ణ వరకు హిట్ సినిమా సీక్వెల్స్లో నటించి చేతులు కాల్చుకున్నారు. భీభత్సమైన హైప్తో విడుదలైన ఆ చిత్రాలు బాక్సాఫీస్ వద్ద తీవ్ర నిరాశను మిలిచ్చాయి.
అయితే పాన్ఇండియా లెవల్లో ‘బాహుబలి’ సిరీస్ వచ్చి ఆ ముద్రను చెరిపేసింది. అనంతరం కన్నడ చిత్రపరిశ్రమలోనూ పాన్ ఇండియా లెవల్లో రూపొందిన ‘కేజీయఫ్’ సీక్వెల్స్.. ఈ ఫార్ములాకు మరింత బలాన్ని ఇచ్చింది. దీంతో ఆ ఊపులో సౌత్లో వీటి హవా గణనీయంగా పెరిగింది. ప్రస్తుతం అదే ట్రెండ్గా మారింది. ఎంతలా అంటే పాన్ ఇండియా వైరస్లా ఎలా పట్టుకుందో, సీక్వెల్ ఫీవర్ కూడా అంతే పట్టుకుంది. ఇక పుష్ప తొలి భాగం ఘన విజయం సాధించడం.. రెండో భాగాన్ని ప్రకటించడంతో.. అందరీ దృష్టి టాలీవుడ్పై పడింది. ఇప్పటికే పలువురు దర్శకనిర్మాతలు కూడా.. కొనసాగింపు కథలతో సినిమాలను రూపొందించేందుకు సిద్ధమయ్యారు. ఈ క్రమంలోనే ఇటీవలే విడుదలైన కమల్హాసన్ విక్రమ్, కల్యాణ్ బింబిసార ప్రేక్షకుల్ని విపరీతంగా ఆకట్టుకున్నాయి. ఇవి కూడా రెండో భాగం ఉంటాయని దర్శకనిర్మాతలు ప్రకటించారు. దీంతో ఇప్పుడందరీ దృష్టి ఈ చిత్రాలపై పడింది. ఎప్పుడొస్తాయని ప్రేక్షకులు ఆసక్తిగా ఎదురుచూస్తున్నారు. ఇదిలా ఉంటే.. చాలా హిట్ సినిమాల సీక్వెల్స్ ప్రకటించి ఇప్పటికే చాలా కాలమైనా ఒకటి రెండు మినహా ఇంకా ఏమీ సెట్స్పైకి వెళ్లలేదు. కానీ వాటి మీద భారీ అంచనాలే ఉన్నాయి. మరి ఆ చిత్రాలేంటో ఓ సారి చూసేద్దాం…
‘పుష్ప 2’.. టాలీవుడ్ నుంచి బాలీవుడ్ వరకు ఇండియన్ ఇండస్ట్రీతో సహా సినీప్రియులు ఎంతో ఆసక్తిగా ఎదురుచూసే మొట్టమొదటి చిత్రం ఇదే. ఎందుకంటే తొలి భాగం అంతలా ఆకట్టుకుంది. సోషల్మీడియా ఇంట బయట ఎక్కడ చూసిన పుష్ప ఫీవరే. రీల్స్, సాంగ్స్, డైలాగ్స్తో నెటిజన్లు తగ్గేదే లే అంటూ తెగ సందడి చేశారు. మొత్తంగా బన్నీ గెటప్, యాక్షన్ సినిమాకే హైలెట్. అయితే ఈ చిత్రానికి కొనసాగింపుగా రెండో భాగం ప్రకటించినప్పటికీ.. ఇంకా సెట్స్పైకి వెళ్లలేదు. ప్రస్తుతం దర్శకుడు సుకుమార్.. కథలో మార్పులు చేసి.. తారలను ఎంపిక చేసే ప్రక్రియలో బిజీగా ఉన్నారని తెలిసింది.
హిట్ 2 విశ్వక్సేన్ హీరోగా వచ్చిన క్రైమ్ థ్రిల్లర్ ‘హిట్’ సూపర్ హిట్గా నిలిచింది. ఈ సినిమాకి కొనసాగింపుగా ‘హిట్ 2’ను ప్రకటించి.. షూటింగ్ స్టార్ట్ చేశారు. కానీ ఆ తర్వాత ఈ మూవీ చిత్రీకరణ ఎక్కడ వరకు వచ్చిందో స్పష్టత రాలేదు. కనీసం ఎటువంటి అప్డేట్స్ కూడా రాలేదు. ఇందులో హీరో అడివిశేష్ ప్రధాన పాత్ర పోషించారు. ‘హిట్’ను తెరకెక్కించిన శైలేష్‌ కొలను దర్శకత్వంలోనే ఈ రెండో భాగం రూపొందుతోంది. సంగీతం-జాన్‌ స్టీవర్స్‌ ఎడురి, ఛాయాగ్రహణం-మణికందన్‌ అందించనున్నారు.
గూఢచారి.. స్పై థ్రిల్లర్ నేపథ్యంలో తెలుగు ప్రేక్షకుల్ని విశేషంగా అలరించిన చిత్రం ‘గూఢచారి’. చూపు తిప్పుకోనివ్వని కథ, కథనాలతో ప్రేక్షకుల్ని కట్టిపడేసింది. శశి కిరణ్‌ తిక్క దర్శకత్వం వహించిన ఈ చిత్రాన్ని అభిషేక్‌ నామ, అభిషేక్‌ అగర్వాల్‌, టి.జి. విశ్వ ప్రసాద్‌ నిర్మించారు. శోభిత దూళిపాళ్ల, ప్రకాశ్‌ రాజ్‌, జగపతి బాబు తదితరులు కీలక పాత్రలు పోషించారు. అయితే ఈ ఉత్కంఠభరిత చిత్రానికి సీక్వెల్ తీసుకొస్తున్నట్టు చిత్ర బృందం కొన్నాళ్ల క్రితమే ప్రకటించింది. కానీ ఆ తర్వాత ఇది కూడా ఎక్కడివరకు వచ్చిందో తెలియలేదు.
ఇండియన్ 2.. కమల్హాసన్- శంకర్‌ల క్రేజీ ప్రాజెక్ట్ ‘భారతీయుడు 2’. గతంలో వీరి కలయికలోనే వచ్చిన ‘భారతీయుడు’ సినిమాకి సీక్వెల్‌గా రూపొందుతోన్న చిత్రమిది. ఇప్పటికే దాదాపు 70శాతం చిత్రీకరణ పూర్తి చేసుకున్న ఈ సినిమా.. పలు కారణాలతో చాలా కాలంగా ఆగిపోయింది. మళ్లీ సెట్స్పైకి ఎప్పుడు వెళ్తుందా అని అభిమానులు ఎదురుచూశారు. అయితే ఇటీవలే తాజా ఈ విషయమై హీరోయిన్గా నటిస్తున్న కాజల్‌ అగర్వాల్‌ స్పష్టత ఇచ్చింది. ఈ సినిమా షూటింగ్ సెప్టెంబర్‌ 13న తిరిగి ప్రారంభమవుతుందని.. ఈ షెడ్యూల్‌తోనే తాను తిరిగి సెట్స్‌లోకి అడుగు పెట్టనున్నట్లు వెల్లడించింది. అయితే ప్రస్తుతం శంకర్‌.. రామ్‌చరణ్తో ఆర్సీ 15 చేస్తున్నారు.
ఖైదీ 2, విక్రమ్ 2.. లోకేష్ కనగరాజ్ తెరకెక్కిస్తున్న మల్టీవర్స్ చిత్రాలు ‘ఖైదీ’, ‘విక్రమ్’. ఈ రెండు చిత్రాలు విడుదలై ఘన విజయాలు సాధించాయి. వీటి సీక్వెల్ కోసం అభిమానులు ఎంతో ఆసక్తిగా ఎదురుచూస్తున్నారు. సీక్వెల్లో కమల్హాసన్, కార్తి, విలన్గా సూర్య కలిసి నటిస్తారు. అయితే కార్తి నటించిన ‘విరుమాన్‌’ తమిళ చిత్రం ఈ నెలలోనే విడుదల కానుంది. దీని ప్రచార కార్యక్రమాల్లో భాగంగా కార్తి .. ‘ఖైదీ-2’ గురించి మాట్లాడారు. వచ్చే ఏడాది చివర్లో ఖైదీ-2 ప్రారంభమయ్యే అవకాశముందని చెప్పారు. కాగా, ప్రస్తుతం దర్శకుడు లోకేష్ కనకరాజ్‌.. ‘దళపతి-67’ సినిమా కోసం కసరత్తు చేస్తున్నారు. మరోవైపు కమల్హాసన్ ఇక భారతీయుడు 2 కోసం సిద్ధం అవుతున్నారు. ఇవ్వన్నీ పూర్తవ్వగానే ‘ఖైదీ’, ‘విక్రమ్’ సీక్వెల్స్ రానున్నాయి.
కేజీయఫ్ 3 .. ‘కేజీయఫ్-2’.. భారీ అంచనాలతో ఏప్రిల్‌ 14న విడుదలైన ఈ సినిమాకు ప్రేక్షకుల నుంచి విశేషస్పందన లభించింది. ఓ సంచలనం సృష్టించింది. ఇక ఈ చిత్ర క్లైమాక్స్లో ఊహించని సర్ప్రైజ్ ఇచ్చిన దర్శకుడు ప్రశాంత్ నీల్.. కేజీయఫ్ 3 ఉంటుందని చెప్పకనే చెప్పాడు. ఆ తర్వాత నిర్మాతలు కూడా ఈ విషయమై క్లారిటీ ఇచ్చారు. అయితే ఎప్పుడనేది చెప్పలేదు. ప్రస్తుతం ప్రశాంత్ నీల్.. ప్రభాస్తో సలార్తో బిజీ అయ్యారు. అలాగే త్వరలోనే ఓ కొత్త ప్రాజెక్ట్తో ప్రేక్షకుల ముందుకు రానున్నారు. ఈ రెండు ప్రాజెక్ట్లు పూర్తయ్యాకే కేజీయఫ్ 3 తెరకెక్కే అవకాశముంది.
దృశ్యం 3.. నటుడు మోహన్‌లాల్‌, దర్శకుడు జీతూ జోసెఫ్‌ల కలయికకు సినీప్రియుల్లో మంచి క్రేజ్‌ ఉంది. ఈ ఇద్దరి కలయిక నుంచి వచ్చిన ‘దృశ్యం’, ‘దృశ్యం 2’ చిత్రాలు మంచి విజయాల్ని అందుకున్నాయి. అలానే దృశ్యం 3 కూడా ఉంటుందని దర్శకుడు ఇప్పటికే స్పష్టత ఇచ్చారు. అయితే కనీసం మూడేళ్ల సమయం పడుతుందని ముందే క్లారిటీ ఇచ్చారు. ఇది వస్తే.. ఇప్పటికే తొలి రెండు భాగాలతో తెలుగులో సందడి చేసిన విక్టరీ వెంకటేశ్.. మూడో భాగాన్ని కూడా రీమేక్ చేసి అలరిస్తారు.
ఇక తెలుగులో ఫన్ అండ్ ఫుల్ కామెడి ఎంటర్టైన్మెంట్ ఫ్రాంచైజీ ఎఫ్ సిరీస్. ఈ ఫ్రాంచేజీలో వచ్చిన ఎఫ్ 2, ఎఫ్ 3 సూపర్హిట్ అందుకున్నాయి. అయితే దర్శకుడు అనిల్రావిపూడి ప్రస్తుతం బాలయ్యతో ఓ సినిమా ప్రారంభించబోతున్నారు. ఇది పూర్తయ్యాక ఎఫ్ 4 ఉంటుంది.
ఈ చిత్రాలతో పాటు ఇంకా పలు చిత్రాలు ఉన్నాయి. వాటిలో క్లాసిక్ హిట్ చిరంజీవి ‘జగదేకవీరుడు అతిలోకసుందరి’, బాలకృష్ణ ‘ఆదిత్య 369’, ఇంకా ప్రభాస్ ‘సలార్’, ‘ప్రాజెక్ట్ కెట’, రజనీకాంత్ చంద్రముఖి ‘సీక్వెల్’, రణ్బీర్ కపూర్ ‘బ్రహ్మాస్త్రం’ ఉన్నాయి.
