బ్యాంక్ ఉద్యోగాలకు ప్రిపేర్ అవుతున్న వారికి గుడ్ న్యూస్. ఎప్పుడెప్పుడా అని ఎదురు చూస్తున్న తరుణం రానే వచ్చింది. ఎట్టకేలకు ఐబీపీఎస్ 4,045 క్లర్క్ పోస్టుల భర్తీ కోసం భారీ నోటిఫికేషన్ విడుదల చేసింది. కామన్ రిక్రూట్మెంట్ ప్రక్రియ ద్వారా ఎంపికైన అభ్యర్థులను దేశవ్యాప్తంగా మొత్తం 11 ప్రభుత్వ రంగ బ్యాంకులకు సంబంధించిన శాఖల్లో నియమించనుంది.
ఈ ఉద్యోగానికి దరఖాస్తు చేసుకునే అభ్యర్థులు ప్రభుత్వ గుర్తింపు పొందిన విశ్వవిద్యాలయం నుంచి డిగ్రీ ఉత్తీర్ణత సాధించి ఉండాలి. అలాగే కచ్చితంగా కంప్యూటర్ పరిజ్ఞానం ఉండాలి. వయస్సు 2023 జులై 1 నాటికి 20 నుంచి 28 ఏళ్ల మధ్య కలిగి ఉండాలి. ఆయా కేటగిరీలను అనుసరించి వయోపరిమితి సడలింపులు కూడా ఉంటాయి. జనరల్ కేటగిరీ అభ్యర్థులు రూ.850 దరఖాస్తు రుసుముగా చెల్లించాల్సి ఉంటుంది. ఎస్సీ, ఎస్టీ, దివ్యాంగులు రూ.175 అప్లికేషన్ ఫీజుగా చెల్లించాల్సి ఉంటుంది.
జులై 1 నుంచి జులై 21 వరకు ఆన్‌లైన్‌లో దరఖాస్తు చేసుకోవచ్చు. దరఖాస్తు రుసుం(జనరల్ ₹850) చెల్లింపునకు ఆఖరి తేదీ జులై 21. ప్రిలిమినరీ పరీక్ష ఆగస్టు లేదా సెప్టెంబర్ల్లో నిర్వహిస్తారు. మెయిన్‌ పరీక్ష 2023 అక్టోబర్లో జరుగుతుంది.
