కరోనా వల్ల ఇంటర్వూలు కూడా ఆన్ లైన్ లోనే పెట్టేస్తున్నారు. ఇది చాలామందికి సులభంగానే ఉన్నా..నెట్ సరిగ్గాలేని వారికి మాత్రం కాస్త కష్టంగానే ఉంది.. ముఖ్యంగా వీడియోకాల్ అయితే.. వారు మన ఫేషియల్ ఎక్సప్రెషన్స్ ను, బ్యాక్ గ్రౌండ్ ను బట్టి మనమీద ఒక ఒపీనియన్ కు వస్తారు. అందుకే చాలా మంది ఆన్ లైన్ ఇంటర్వూ అనేసరికి.. చక్కగా రెడీ అయిపోయి.. మంచి ప్లేస్ సెట్ చేసుకుంటారు. ఓ యువకుడికి ఆన్‌లైన్ ఇంటర్వ్యూ వల్ల పెద్ద సవాల్ ఎదురైంది. దాని కోసం అతను అడవిలో ఓ కొండ ఎక్కాల్సి వచ్చిందట.
మలేషియాలో ఉంటున్న 19 ఏళ్ల యువకుడు ఫ్రాంక్ స్టువార్డ్ పాంటింగ్ వీడియో, ఫోటోలు ఫేస్‌బుక్‌లో ఇప్పుడు వైరల్ అవుతున్నాయి. అతను ఓ పల్లె టూరిలో ఉంటున్నాడు. అక్కడ ఇంటర్నెట్ కనెక్షన్ లేదు. కానీ ఓ రోజు ఆన్‌లైన్ ఇంటర్వ్యూలో పాల్గొనాల్సిందిగా కాల్ వచ్చింది. దాంతో అతనికి టెన్షన్ పెరిగిపోయింది. ఆన్‌లైన్ ఇంటర్వ్యూ అంటే కచ్చితంగా ఇంటర్నెట్ ఉండాలి. ఉంటే సరిపోదు.. నెట్ స్పీడ్ కూడా ఎక్కువగా ఉండాలి. అతను ఉన్నచోట సరిగా సిగ్నల్స్ రావు. దాంతో ఇంటర్వ్యూలో పాల్గొనే ఛాన్స్ మిస్సవుతానని తెగ టెన్షన్ పడ్డాడు.
రేకుల షెడ్ తో సెట్టింగ్
ఏం చెయ్యాలి అని ఆలోచించిన ఫ్రాంక్… ఊరికి దగ్గర్లో ఉన్న కొండను రెండు గంటలపాటూ కష్టపడి ఎక్కాడు. అక్కడ నెట్ సిగ్నల్స్ కోసం వెతికాడు. చివరకు ఓ చోట పాత రేకుల షెడ్ దగ్గర సిగ్నల్స్ వస్తున్నట్లు కనిపించడంతో… వెంటనే అక్కడ తాత్కాలిక ఏర్పాట్లు చేసుకున్నాడు. చాప ఏర్పాటు చేసుకొని, తన వెనక ఓ కర్టెన్ వేలాడదీసుకున్నాడు. చివరకు అక్కడ ల్యాప్‌టాప్‌తో ఆన్‌లైన్ ఇంటర్వ్యూలో పాల్గొనాలి అనుకున్నాడు.
వదలని వాన
ఫ్రాంక్ కష్టాలు అప్పుడే తీరలేదు..సరిగ్గా ఇంటర్వ్యూ మొదలయ్యే ముందు జోరుగా వాన పడింది. దాంతో అతని బట్టలు తడిసిపోయాయి. ఆ వెంటనే రకరకాల కీటకాలు అతన్ని కుట్టడం మొదలుపెట్టాయట పాపం… ఇలా ఇబ్బందులు పడుతూనే ఇంటర్వ్యూ పూర్తి చేశాడు. ఇంటర్వ్యూ చేసేవారికి తన కష్టాలు తెలియకుండా… అంతా బాగానే ఉన్నట్లు నటించాడు. ఇందుకు సంబంధించిన వీడియో, ఫొటోలను అతని సోదరుడు ఫేస్‌బుక్‌లో షేర్ చేశాడు.. అతను చేసిన ఈ ప్రయత్నాన్ని నెటిజన్లు మెచ్చుకుంటున్నారు. అతనికి కచ్చితంగా ఉద్యోగం రావాలని కోరుకుంటున్నారు.
