అమెరికా గగనతలంలో మరోసారి అనుమానాస్పద వస్తువు కలకలం సృష్టించింది. మిషిగన్ రాష్ట్రంలోని హురాన్ సరస్సు ప్రాంతంలో.. 20 వేల అడుగుల ఎత్తులో స్థూపాకార వస్తువు ప్రయాణిస్తున్నట్లు అధికారులు గుర్తించారు. వెంటనే దాన్ని ఫైటర్ జెట్ తో కూల్చేశారు. ఈ మేరకు వైట్హౌస్ అధికారికంగా వెల్లడించింది. పది రోజుల్లో ఇలా అగ్రరాజ్యం గగనతలంలో అనుమానిత వస్తువులు కనిపించడం ఇది నాలుగోసారి అని తెలిపింది.
“గగనతలంలో సుమారు 20వేల అడుగుల ఎత్తులో ఎగురుతున్న స్థూపాకార వస్తువును గుర్తించాం. అధ్యక్షుడు జో బైడెన్ ఆదేశాల మేరకు ఎఫ్-16 ఫైటర్ జెట్ AIM9x ద్వారా కూల్చేశాం. ఈ ఘటన వల్ల పౌరులెవరికీ ఎటువంటి గాయాలు కాలేదు. ఆర్మీ స్థావరాల సమీపంలో ఆ అనుమానాస్పద వస్తువు సంచరించింది. అయితే దాని వల్ల ఎటువంటి సైనిక ముప్పు లేదు. కానీ విమానాల రాకపోకలకు అంతరాయం కలుగుతుందని భావించి కూల్చివేశాం. దానికి నిఘా సామర్థ్యం ఉందేమోనన్న అనుమానంతో ఈ పని చేశాం. దీనిపై మా బృందం పరిశోధనలు జరుపుతోంది” అని పెంటగాన్ ప్రెస్ సెక్రటరీ బ్రిగ్ జనరల్ పాట్ రైడర్ తెలిపారు
