ప్ర‌స్తుతం బాలయ్య హ‌వా నడుస్తోంది. ఇంకా చెప్పాలంటే ప‌ట్టింద‌ల్లా బంగార‌మే అవుతోంది. అఖండ సినిమా విజ‌యం త‌రువాత ఆయన 107 వ చిత్రం షూటింగ్ కూడా శ‌ర‌వేగంగా జ‌రుగుతోంది. ఓ ఇంట్ర‌స్టింగ్ పాయింట్ తో గోపీచంద్ మ‌లినేని ఈ చిత్రాన్ని రూపొందిస్తున్నారు.ఈ సినిమా త‌రువాత కూడా బాలయ్య వేగం ఎక్కడా ఆగేలా లేదు. ఎందుకంటే ఆయన వ‌రుస క‌మిట్మెంట్ లు అలా ఉన్నాయి. జ‌యాప‌జ‌యాల‌ను పెద్ద‌గా ప‌ట్టించుకోని హీరోగానే కాదు, రికార్డుల తిరగ‌మోత‌లోనూ ఆయ‌నే నంబ‌ర్ ఒన్ అని అనిపించుకున్న దాఖ‌లాలు ఎన్నో !
పెద్దాయ‌న ఎన్టీఆర్ న‌ట వార‌స‌త్వాన్ని అందుకుని ముందుకు దూసుకుపోతున్న వైనం న‌భూతో ! అదేవిధంగా వెండి తెర మెరుపులే కాదు బుల్లి తెర‌పై కూడా ఆయ‌న‌కు తిరుగు లేద‌ని నిరూపించుకున్నారు. ఆహా ఓటీటీలో అన్ స్టాప‌బుల్ పేరిట ఎవ్వ‌రూ ఊహించ‌ని రీతిలో టాక్ షో ఒక‌టి నిర్వ‌హించి నంబ‌ర్ ఒన్ రేటింగ్ ఉన్న ప్రొగ్రాంగా మ‌లిచారు. ఓటీటీ చ‌రిత్ర‌లోనే మరో అధ్యాయాన్ని లిఖించారు. మ‌నల్ని ద్వేషించిన వారిని సైతం ప్రేమిస్తే అదొక గొప్ప ఆనందాల‌కు సంకేతం అవుతుంది అని కూడా చెప్పారు. కొత్త త‌రానికి కొత్త త‌ర‌హా ప్రెజెంటేష‌న్ అందించి ప్ర‌పంచ వ్యాప్తంగా ఆయన పాపుల‌ర్ అయ్యారు. ఓ ద‌శ‌లో బాలీవుడ్ కూడా ఓటీటీలో ఆహా షో రేటింగ్స్ చూసి అవాక్క‌యింది.
