Bharat Bandh : నేడు భారత్ బంద్. ఈ బంద్ దేశ వ్యాప్తంగా కొనసాగనుంది. కనీస మద్దతు ధరకి చట్టబద్ధతతోపాటు పలు డిమాండ్ల సాధన కోసం దేశ రాజధాని ఢిల్లీని ముట్టడించిన రైతులు తమ ఉద్యమాన్ని మరింత ఉధృతం చేస్తున్నారు. ఈ తరుణంలోనే ఇవాళ గ్రామీణ భారత్‌బంద్‌కు పిలుపునిచ్చారు. తమ సమస్యలను ప్రజలకు వివరించి, కేంద్ర ప్రభుత్వ తీరును ఎండగట్టేందుకే భారత్‌బంద్‌కు పిలుపునిచ్చినట్టు సంయుక్త కిసాన్‌ మోర్చా ప్రకటించింది.
ఈ బంద్‌కు పలు కేంద్ర కార్మిక సంఘాలు కూడా మద్దతు ప్రకటించాయి. ఇవాళ ఉదయం 6 గంటల నుంచి సాయంత్రం 4 గంటల వరకు బంద్ కొనసాగుతుందని రైతు సంఘాల నేతలు ప్రకటించారు. అదేవిధంగా ఇవాళ మధ్యాహ్నం 12 గంటల నుంచి సాయంత్రం 4 గంటల వరకు జాతీయ రహదారులన్నింటినీ స్తంభింపజేస్తామని తెలిపారు. ఇందుకు రైతులందరూ సహకరించాలని కోరాయి కార్మిక సంఘాలు. కాగా భారత్ బంద్ నేపథ్యంలోనే కొన్ని చోట్ల విద్యాసంస్థలు మూత పడనున్నాయి. మరికొన్ని చోట్ల యథావిధిగా కొనసాగనున్నాయి.
