కన్నడ నాట ఎన్నికలు ఎంత నాటకీయంగా జరిగాయో తెలిసిందే. ఎన్నికలే కాదు ఆ తర్వాత సీఎం ఎన్నిక కూడా అంతే నాటకీయంగా జరిగింది. అయితే కన్నడ ప్రజల మనసు దోచుకోవడానికి కాంగ్రెస్ పార్టీ ఎన్నికల్లో ఉచిత హామీలు గుప్పించి. తాజాగా అందులో ఓ హామీని నిలబెట్టుకుంది.
కర్ణాటకలోని మహిళలు ఇకపై ఉచితంగా బస్సులో ప్రయాణించొచ్చు. రాష్ట్రంలోని మహిళలంతా ఉచితంగా బస్సులో ప్రయాణించేలా శక్తి పథకాన్ని ప్రారంభించింది కాంగ్రెస్ ప్రభుత్వం. ఆదివారం విధాన సౌధ వద్ద జరిగిన కార్యక్రమంలో ముఖ్యమంత్రి సిద్ధరామయ్య కండక్టర్గా మారి ఉచిత టికెట్లు ఇచ్చారు. మెజెస్టిక్‌ నుంచి విధానసౌధ వరకు బస్సులో ప్రయాణించారు. ఈ కార్యక్రమానికి ఉపముఖ్యమంత్రి డీకే శివకుమార్, సహా పలువురు మంత్రులు హాజరయ్యారు.
బెంగళూరు మెట్రోపాలిటన్ ట్రాన్స్‌పోర్ట్ కార్పొరేషన్, నార్త్ వెస్ట్ కర్ణాటక రోడ్ ట్రాన్స్‌పోర్ట్ కార్పొరేషన్, కర్ణాటక స్టేట్ రోడ్ ట్రాన్స్‌పోర్ట్ కార్పొరేషన్, కల్యాణ కర్ణాటక రోడ్ ట్రాన్స్‌పోర్ట్ కార్పొరేషన్ పరిధిలో నడుపుతున్న బస్సుల్లో ఈ శక్తి పథకం ప్రయోజనాలను పొందవచ్చని ప్రభుత్వం తెలిపింది. మహిళా ప్రయాణికులు ప్రయాణించే దూరాన్ని బట్టి.. ఆయా రోడ్డు ట్రాన్స్ప్రోర్ట్ కార్పొరేషన్లకు రీయింబర్స్మెంట్ చేస్తామని ప్రభుత్వం వెల్లడించింది.
