వారం క్రితం జమ్ముకాశ్మీర్‌లో అనుమానాస్పదంగా కనిపించిన పావురాన్ని అదుపులోకి తీసుకున్న పోలీసులు దాన్ని వదిలేశారు. గులాబీ రంగు వేసిన రెక్కలతో, కాలికి ఓ రింగు తొడగబడి ఉన్న ఓ పావురం గత ఆదివారం నాడు జమ్ము కాశ్మీర్‌లోని కతువా జిల్లాలో దొరికింది. కాలికిఉన్న ఆ రింగు మీద ఓ నంబరు ఉండటం, అది పాకిస్థాన్‌ వైపు నుండి రావడంతో, దాన్ని పాకిస్థాన్‌ ‘గూఢచారి’గా అనుమానించి పోలీసులు అరెస్టు చేశారు.
నాలుగైదు రోజుల దర్యాప్తు తర్వాత, ఎటువంటి అనుమానాస్పద సమాచారం లభించకపోవడంతో ఆ పావురాన్ని గురువారం నాడు వదిలేశామని జమ్ముకాశ్మీర్‌ సీనియర్‌ పోలీసు అధికారి శైలేంద్ర మిశ్రా రాయిటర్స్‌కు తెలిపారు. విశ్వసనీయ సమాచారం మేరకు ఆ పావురం ఎక్కడ దొరికిందో, అక్కడే వదిలేసినట్లు తెలిసింది. అయితే, పాకిస్థాన్‌ నుండి ఆ పావురం తనదేనంటూ హబీబుల్లా అనే వ్యక్తి తెలిపాడు. ఆ పావురం తన పెంపుడు పక్షి అని, దానికి ఎటువంటి గూఢచర్య, ఉగ్రవాద కార్యకలాపాలతో సంబంధం లేదని అతను రాయిటర్స్‌ వార్తా సంస్థకు తెలియజేశాడు. దాని కాలికున్న రింగు మీద ఉన్న నంబరు నిజానికి తన మొబైల్ ఫోన్ నంబరని, కావాలంటే ఆ నంబరుకు ఫోన్ కూడా చేయవచ్చని ఆయన స్పష్టం చేశాడు. సరిహద్దు సమీపంలోని పాకిస్థాన్‌ గ్రామంలో నివసించే హబీబుల్లా, పావురాల పోటీలకు ఈ పావురాన్ని తరచూ పంపుతానని, అందుకే దాని రెక్కలకు గులాబీ రంగు వేసి, తన మొబైల్ నంబరుతో రింగు తొడిగానని శుక్రవారం నాడు తెలిపాడు. అయితే భారత పోలీసులు వదిలేసిన తర్వాత ఆ పావురం ఇంటికి చేరిందీ లేనిది తెలియరాలేదు.
‘‘ ఈ ప్రాంతం సాధారణంగా అత్యంత సున్నితమైనది. పైగా ఇటువంటి చొరబాట్లు గతంలో చాలాసార్లు జరిగాయి’ అని ఆ ప్రాంత పోలీసు అధికారి ఒకరు తెలిపారు. మే 2015లో, అక్టోబరు 2016 లోనూ పాకిస్థాన్‌ నుంచి వచ్చిన పావురాలు పట్టుబడ్డాయని, అందులో ఒకటి భారత ప్రధానమంత్రికి బెదిరింపును మోసుకొచ్చిందని ఆయన తెలిపారు.
