తెలంగాణలోని 120 మునిసిపాలిటీల్లో 2,647 వార్డులు, 9 కార్పొరేషన్లలోని 324 డివిజన్లకు ఇటీవల జరిగిన ఎన్నికల ఓట్ల లెక్కింపు ప్రారంభమైంది. ఉదయం 8 గంటలకు లెక్కింపు మొదలు కాగా తొలుత పోస్టల్ బ్యాలెట్లు లెక్కిస్తున్నారు. అనంతరం బ్యాలెట్ పేపర్లు లెక్కించనున్నారు. ఓట్ల లెక్కింపు కోసం 134 కౌంటింగ్‌ కేంద్రాల్లో 2,169 టేబుళ్లు ఏర్పాటు చేశారు. ఇదిలా ఉంటే.. మంథనిలో బ్యాలెట్ బాక్సులో ఓట్లను లెక్కిస్తున్న అధికారులకు ఓ లేఖ దొరికింది.
ఓట్లతో పాటు బాక్సులో లేఖ ఉండటంతో అధికారులు ఆశ్చ‌ర్య‌పోయారు. అస‌లు ఆ లేఖలో ఏముందా అని ఓపెన్ చేసి చదివారు. అది ఓ దివ్యాంగుడు మంత్రి కేటీఆర్ కు రాసిన లేఖ. మంత్రి కేటీఆర్ ను కలవాలని ఉందని దివ్యాంగుడు ఆ లేఖలో రాశాడు. వెన్నెముక గాయాలతో దివ్యాంగుల జీవితాలు దుర్భరంగా ఉన్నాయని లేఖలో వాపోయాడు. కేటీఆర్ ను కలిసేందుకు ఒక్క అవకాశం ఇవ్వాలని లేఖలో కోరాడు. మరి దీనిపై మంత్రి కేటీఆర్ ఎలా స్పందిస్తారో చూడాలి.
