టీడీపీకి పూర్వ వైభవం తీసుకొచ్చేందుకు ఆ పార్టీ అధినేత చంద్రబాబు నాయుడు తీవ్రంగా శ్రమిస్తున్నారు. ఈ క్రమంలోనే తెలంగాణలో పార్టీకి గత వైభవం తీసుకొచ్చి.. కార్యకర్తల్లో ఉత్సాహం నింపడానికి ఓ ముందడుగేశారు. ఈ క్రమంలోనే ఖమ్మం జిల్లాలో టీడీపీ శంఖారావం బహిరంగ సభను నిర్వహించారు.
ఈ క్రమంలోనే హైదరాబాద్ నుంచి ఖమ్మం నగరానికి భారీ ర్యాలీగా తరలి వెళ్లారు. ఖమ్మం జిల్లాలో చంద్రబాబుకు ఘనస్వాగతం లభించింది. కూసుమంచి మండలం కేశవాపురంలో ఏర్పాటు చేసిన ఎన్టీఆర్‌ విగ్రహాన్ని చంద్రబాబు ఆవిష్కరించారు. తెలంగాణను అభివృద్ధి చేసింది తెలుగుదేశం పార్టీ అని చంద్రబాబు గుర్తు చేశారు.
‘‘ఖమ్మం జిల్లాను తీర్చిదిద్దాం. ఉమ్మడి రాష్ట్రంలో హైదరాబాద్‌లో ఐటీ స్థాపించాం. అప్పట్లో సెల్‌ఫోన్‌ బువ్వ పెడుతుందా అని ఎగతాళి చేశారు. ఇప్పుడు సెల్‌ఫోన్‌ లేకుండా భార్యాభర్తలు కూడా ఉండలేరు. ఎన్టీఆర్‌ తెలుగుజాతి గౌరవాన్ని నిలబెట్టారు. తెలుగు ప్రజలకు ఆయన ఒక ధైర్యం. ఆయన విగ్రహం ముందు తీసుకున్న ఏ సంకల్పం అయినా నెరవేరుతుంది. తెలుగు వాళ్లు ఎక్కడ ఉన్నా వారి అభివృద్ధి కోసం పనిచేసే పార్టీ తెదేపా. అది తెలంగాణ అయినా, ఆంధ్రప్రదేశ్‌ అయినా. మీ అభిమానాన్ని గుర్తుంచుకుంటా’’ అని చంద్రబాబు తెలిపారు.
