వాహనదారులకు అలర్ట్‌..హైదరాబాద్‌ లో నేడు ట్రాఫిక్ ఆంక్షలు ఉండనున్నాయి. ఇవాళ సాయంత్రం 6 గంటలకు యూసుఫ్‌గూడ 1వ TSSP బెటాలియన్ గ్రౌండ్ నందు తెలుగు సినిమా ” సర్కారు వారి పాట” ప్రీ-రిలీజ్ కార్యక్రమం జరుగనుంది. ఈ సందర్భంగా యూసుఫ్‌గూడ బెటాలియన్ పరిసర ప్రాంతాలలో వాహనాలు అధిక సంఖ్యలో తిరిగే అవకాశం వున్నది. ఇందువలన మధ్యాహ్నం 5 గంటల నుండి రాత్రి 11 గంటల వరకు ట్రాఫిక్ రద్దీ ఉంటుందని అంచనా వేశారు పోలీసులు.
ఇట్టి పరిస్థితులలో అవసరాన్నిబట్టి ట్రాఫిక్ క్రింది ప్రదేశాలలో మళ్లించబడుతుంది:
1) మైత్రీవనం నుండి వచ్చే బస్సులు మరియు భారీ వాహనములు యూసుఫ్‌గూడ చెక్‌పోస్ట్ వైపు అనుమతించబడవు. సవేరా ఫంక్షన్ హాల్ వద్ద కృష్ణకాంత్ పార్క్ – కళ్యాణ్ నగర్ వైపు మరియు సత్యసాయి నిగమాగమం – కమలాపురి కాలనీ – కృష్ణ నగర్ – జూబ్లీహిల్స్ వైపు ట్రాఫిక్ మళ్లించబడుతాయి.
2) జూబ్లీహిల్స్ నుండి వచ్చే బస్సులు మరియు భారీ వాహనములు యూసుఫ్‌గూడ చెక్‌పోస్ట్ వైపు అనుమతించబడవు. శ్రీ నగర్ కాలనీ వద్ద సత్యసాయి నిగమాగమం వైపు వాహనములు మళ్లించబడుతుంది.
ప్రీ-రిలీజ్ ఈవెంట్‌కు హాజరయ్యే వ్యక్తులందరూ తప్పనిసరిగా నిర్వాహకులు జారీ చేసిన పాస్‌లను కలిగి ఉండాలి మరియు అలాంటి పాస్‌లలో హోలోగ్రాం (HOLOGRAM) మరియు సీరియల్ నంబర్ కలిగి ఉండాలి. పాస్‌లు లేని ఆహ్వానితులు బెటాలియన్ గ్రౌండ్లోకి అనుమతించరు.
