చైనాతో సరిహద్దులో ఉద్రిక్తతలు తగ్గించేందుకు జరుగుతోన్న చర్చలు ఎలాంటి ఫలితం ఇవ్వటం లేదు. ఈ క్రమంలో డ్రాగన్కు గట్టి హెచ్చరికలు పంపారు త్రిదళాధిపతి (సీడీఎస్) జనరల్ బిపిన్ రావత్. ఇరు దేశాల మధ్య సైనిక, దౌత్య స్థాయి చర్చలు ఎలాంటి ఫలితాన్ని ఇవ్వకుంటే.. చైనా అతిక్రమణలను సైనిక చర్యలతోనే ఎదుర్కొంటామని స్పష్టం చేశారు. అందుకు తగిన విధంగా సన్నాహాలు జరుగుతున్నాయని తెలిపారు.
లద్ధాఖ్ సెక్టార్ నుంచి చైనా సైన్యాన్ని వెనక్కి పంపేందుకు భారత్ ఎలాంటి సైనిక సన్నాహాలు చేస్తోందో అని వివరించేందుకు నిరాకరించారు రావత్.ఇరు దేశాల మధ్య కుదిరిన ఒప్పందంతో కొన్ని ప్రాంతాల నుంచి సైన్యాన్ని వెనక్కి మళ్లించినా.. ఫింగర్ ఏరియాల నుంచి ఉపసంహరించేందుకు నిరాకరిస్తోంది చైనా. సరిహద్దుల నుంచి సైన్యం ఉపసంహరణను ఆలస్యం చేసేందుకు జాప్యం చేస్తున్నట్లు కనిపిస్తోంది. అయినప్పటికీ.. ఉద్రిక్తతలను తగ్గించే ప్రయత్నాలు కొనసాగుతున్నాయి. తాజాగా ఫింగర్-4 ప్రాంతం నుంచి సమాన దూరంలో ఇరు దేశాలు బలగాలను ఉపసంహరించుకోవాలని చైనా చేసిన ప్రతిపాదనను భారత్ తిరస్కరించింది.
