కరోనా వ్యాక్సిన్ అందుబాటులోకి రాగానే పెద్ద ఎత్తున పంపిణీ చేసేందుకు యూకే ప్రభుత్వం ముమ్మర కసరత్తులు చేస్తోంది. ఈ మేరకు మిలియన్ల కొద్దీ వ్యాక్సిన్ డోసులు అందించేలా ముంబయికి చెందిన అంతర్జాతీయ ఫార్మా సంస్థ ‘వోకార్ట్’తో ఒప్పందం కుదుర్చుకుంది.వ్యాక్సిన్ ఉత్పత్తిలో కీలకమైన ‘ఫిల్ అండ్ ఫినిష్’ ప్రక్రియ నిర్వహించేందుకు సంస్థతో 18 నెలల ఒప్పందాన్ని చేసుకున్నట్లు యూకే వాణిజ్య శాఖ స్పష్టం చేసింది. ఒప్పందంలో భాగంగా వ్యాక్సిన్ను వయల్స్ లోకి నింపి పంపిణీకి సిద్ధం చేయాల్సి ఉంటుంది. వ్యాక్సిన్ సప్లై చైన్ లో ఈ ఒప్పందం కీలకంగా అభివర్ణించింది యూకే ప్రభుత్వం.
ఒప్పందంలో భాగంగా ‘ఫిల్ అండ్ ఫినిష్’ ప్రక్రియను వోకార్ట్ సంస్థ సెప్టెంబర్లో ప్రారంభించనున్నట్లు తెలుస్తోంది. ఉత్తర వేల్స్ లోని వ్రెక్సం ప్రాంతంలో ఉన్న సంస్థ కర్మాగారంలో టీకాల ఉత్పత్తి చేయనున్నట్లు సమాచారం. టీకాను పెద్ద ఎత్తున అందుబాటులోకి తీసుకురావడానికి యూకే ప్రభుత్వంతో ఒప్పందం చేసుకోవడం సంతోషంగా ఉందని వోకార్ట్ సంస్థ చైర్మన్ డాక్టర్ హబిల్ ఖొరకీవాలా పేర్కొన్నారు. కరోనా ప్రభావాన్ని తగ్గించేందుకు ఓ అంతర్జాతీయ సంస్థగా అవసరమైన సాయాన్ని అందిస్తామని స్పష్టం చేశారు.
