జవాన్లతో వెళ్తున్న వాహనం ఘోర ప్రమాదానికి గురైన ఘటన జమ్ముకశ్మీర్లో చోటుచేసుకుంది. పహల్గామ్లోని ఫ్రిస్లాన్ చందన్వారి రోడ్డు ప్రాంతంలో భద్రతా బలగాల వాహనం ప్రమాదానికి గురై నదిలో పడిపోయింది. బస్సు బ్రేకులు ఫెయిలవడం వల్ల ఈ ప్రమాదం జరిగినట్లు తెలుస్తోంది.
ఈ ఘటనలో ఆరుగురు ఐటీబీపీ జవాన్లు చనిపోయారు. 30 మంది సైనికులు గాయాల పాలయ్యారు. ఘటనాస్థలికి చేరుకున్న అధికారులు.. గాయపడిన వారిని చికిత్స నిమిత్తం ఆసుపత్రికి తరలిస్తున్నారు. ఆ ప్రాంతంలో ఇంకా సహాయక చర్యలు కొనసాగుతున్నట్లు అధికారులు తెలిపారు.
“మంగళవారం ఉదయం 39 మంది ఐటీబీపీ జవాన్లతో ప్రయాణిస్తున్న బస్సు.. బ్రేక్లు ఫైయిల్ అవ్వడం వల్ల పక్కన ఉన్న నదిలో పడిపోయింది. ఘటనాస్థలికి అధికారులు చేరుకున్నారు. బస్సులోని జవాన్లంతా అమర్నాథ్ యాత్రకు సంబంధించిన విధులు నిర్వర్తించి తిరిగి వస్తున్నారు” అని ఐటీబీపీ ఉన్నతాధికారులు తెలిపారు.
