వేములవాడ ప్రజలు కేసీఆర్ను మరిచిపోలేరని బీజేపీ రాష్ట్ర అధ్యక్షుడు బండి సంజయ్ అన్నారు. వేములవాడ రాజరాజేశ్వర స్వామి దర్శించుకునేందుకు వచ్చిన భక్తులు శివున్ని మర్చిపోలేరని… అలాగే ముఖ్యమంత్రి కేసీఆర్ను కూడా ఈ ప్రాంత ప్రజలు మర్చిపోలేరని మండిపడ్డారు. ఎందుకంటే యాదాద్రి అభివృద్ధి చేసినట్లే.. వేములవాడను కూడా అభివృద్ధి చేస్తానని చెప్పి మర్చిపోయారని విమర్శించారు. మహాశివరాత్రి జాతర సందర్భంగా భక్తులకు కనీస సౌకర్యాలు ఏర్పాటు చేయడంలో ఈ ప్రభుత్వం విఫలం అయ్యిందని ధ్వజమెత్తారు.
మహాశివరాత్రి జాతర సందర్భంగా రాజరాజేశ్వర స్వామి వారిని బండి సంజయ్ దర్శించుకున్నారు. దర్శనం అనంతరం బండి సంజయ్ సీఎం కేసీఆర్పై తీవ్రస్థాయిలో విమర్శలు చేశారు. “సాక్షాత్తు ఆ పరమశివుని సన్నిధిలో అడుగుతున్నా.. నీ బిడ్డ పేరు దొంగ సారా దందాలో నాలుగుసార్లు వచ్చిందని.. మరి ఎందుకు నోరు విప్పడం లేదు” అని ప్రశ్నించారు.
“వేములవాడ అభివృద్ధికి సీఎం కేసీఆర్ ఇప్పటి వరకు ఎంత కేటాయించారో చెప్పాలి. వేములవాడ దేవాలయానికి సీఎం రూ.50కోట్లు అడిగితే డబ్బులు ఇవ్వడం లేదు. ఇవాళ శివరాత్రి జాతరలో పేదవాళ్లకు కనీస సౌకర్యాలు కూడా ఈ ప్రభుత్వం కల్పించలేదు.” – బండి సంజయ్, బీజేపీ రాష్ట్ర అధ్యక్షుడు
