ద్వితీయ శ్రేణి నగరాలకు ఐటీని విస్తరించాలనే ఉద్దేశంతో తెలంగాణ సర్కార్ రాష్ట్రంలోని పలు నగరాల్లో ఐటీ టవర్లను నిర్మిస్తోంది. వీటి ద్వారా స్థానిక యువతకు ఉద్యోగ అవకాశాలు కల్పించాలని లక్ష్యంగా పెట్టుకుంది. ఇప్పటికే కరీంనగర్, వరంగల్ వంటి నగరాల్లో ఐటీ హబ్లు నిర్మించి.. అంతర్జాతీయ సంస్థలతో ఒప్పందాలు కుదుర్చుకుంది. ఇక తాజాగా నిజామాబాద్, నల్గొండ, సిద్దిపేటలో ఐటీ హబ్ల నిర్మాణం జరుగుతోంది. ఈ క్రమంలోనే ఈనెల 15వ తేదీన సిద్దిపేట ఐటీ హబ్ను ప్రారంభించాలని రాష్ట్ర ప్రభుత్వం నిర్ణయించింది.
సిద్దిపేట పట్టణ శివారులోని నాగులబండ వద్ద రాజీవ్‌ రహదారిని ఆనుకొని నిర్మించిన ఐటీ టవర్‌ ప్రారంభానికి సిద్ధమైంది. ఈ టవర్‌ను పురపాలక, ఐటీ శాఖల మంత్రి కేటీఆర్, ఆర్థిక, వైద్యారోగ్యశాఖల మంత్రి హరీశ్‌రావుతో కలిసి గురువారం ప్రారంభించనున్నారు. 3 ఎకరాల సువిశాల స్థలంలో రూ.63 కోట్లతో జీప్లస్‌ 4 అంతస్తుల్లో ఐటీ టవర్‌ను నిర్మించారు. ఈ టవర్‌ నిర్మాణ పనులకు సీఎం కేసీఆర్‌ 2020 డిసెంబర్‌ 10న శంకుస్థాపన చేశారు. గత ఏడాది నిర్మాణ పనులు ప్రారంభం కాగా, త్వరితగతిన పూర్తయ్యాయి.
