పాఠశాలలు ప్రారంభమైన తొలి రోజే సీఎం వైఎస్ జగన్ చేతుల మీదుగా వరుసగా మూడో ఏడాది కూడా జగనన్న విద్యా కానుక స్టూడెంట్ కిట్లను పంపిణీ చేసింది ప్రభుత్వం. కర్నూలు జిల్లా ఆదోని లో నిర్వహించిన ఈ కార్యక్రమంలో ముఖ్యమంత్రి వీటి పంపిణీని లాంఛనంగా ప్రారంభించారు. రాష్ట్రవ్యాప్తంగా ప్రభుత్వ, ఎయిడెడ్ పాఠశాలల్లో 1 నుంచి 10వ తరగతి వరకు చదువుతున్న 47,40,421 మంది విద్యార్థులకు ఇవి అందనున్నాయి. ఇందుకోసం రూ. 931,02 కోట్లను ప్రభుత్వం వ్యయం చేస్తోంది. ఈ సందర్భంగా ముఖ్యమంత్రి వైయస్ జగన్మోహన్ రెడ్డి మాట్లాడుతూ..
దేవుని దయతో ఈ రోజు మంచి కార్యక్రమానికి శ్రీకారం చుట్టామన్నారు. పేదరికం నుంచి బయటపడాలంటే ప్రతి ఇంట్లో మంచి చదువు ఉండాలని అన్నారు. ప్రతి ఒక్కరు ఇంగ్లీష్ మీడియం చదువుకోవాలని, నాణ్యమైన చదువు తోనే పేదరికం పోతుందన్నారు. నాడు- నేడు కింద ప్రభుత్వ పాఠశాలల రూపు రేఖలు మార్చామని తెలిపారు. జగనన్న గోరుముద్ద పథకం తో బడి పిల్లలకు పౌష్టికాహారం అందిస్తున్నామన్నారు. ఒక్కొ కిట్ విలువ రూ. 2 వేల రూపాయలు అని సీఎం జగన్ అన్నారు. అలాగే స్థానిక ఎమ్మెల్యే సాయిప్రసాద్ రెడ్డి అభ్యర్థన మేరకు ఆదోని కి ముఖ్యమంత్రి వైయస్ జగన్మోహన్ రెడ్డి ప్రభుత్వ డిగ్రీ కళాశాల ను మంజూరు చేశారు.
