పుస్తకాన్ని మించిన స్నేహితుడు లేడు.. చిరిగిన చొక్కా అయినా తొడుక్కో కానీ మంచి పుస్తకం కొనుక్కో అంటారు. పుస్తక పఠనం మనిషి జ్ఞానసముపార్జనకు మూలమైన ఆయుధం. ఇంతటి అమూల్యమైన పుస్తకాలన్ని ఒకే చోట కొలువుదీరితే.. వాహ్.. ఇక పుస్తక ప్రియులకు పండగే. బుక్ లవర్స్ కోసం హైదరాబాద్ లక్డీకాపూల్‌లోని మారుతీ గార్డెన్‌ లో ‘లోడ్ ది బాక్స్’ అనే థీమ్‌తో పుస్తక ప్రదర్శన ఏర్పాటు చేశారు. దిల్లీకి చెందిన కితాబ్‌ లవర్స్ అనే సంస్థ ఏర్పాటు చేసిన ఈ ప్రదర్శనను ప్రముఖ రచయిత దుర్జోయ్‌ దత్తా ప్రారంభించారు.
దత్తా రాసిన కొత్త పుస్తకం ‘వెన్ ఐ యామ్ విత్ యూ’ పుస్తకాన్ని ఆవిష్కరించారు. ఈ ప్రదర్శనలో రొమాన్స్‌ నుంచి ఫాంటసీ, నాన్‌ ఫిక్షన్‌, క్రైమ్‌, వివిధ రకాలైన దాదాపు 10 లక్షల పుస్తకాలు ఏర్పాటు చేసినట్లు ‘కితాబ్‌ లవర్స్’ వ్యవస్థాపకులు రాహుల్‌ పాండే తెలిపారు. ‘లోడ్ ది బాక్స్’ అనే థీమ్‌ 3 రకాలుగా ఉంటుంది. ఈ బాక్స్ మూడు సైజుల్లో రూ.1,100 నుంచి రూ.2,750 మధ్య ఉంటుంది.
బాక్సు కొనుగోలు చేసిన తర్వాత అందులో పట్టినన్ని పుస్తకాలు వినియోగదారులు తీసుకెళ్లవచ్చు. 10 లక్షల పుస్తకాలతో ఏర్పాటు చేసిన ఈ ప్రదర్శనలో అమ్మకాలు చేయడంతో పాటు పాత పుస్తకాలు కొనుగోలు చేయనున్నట్లు నిర్వాహకులు తెలిపారు. ఈ నెల 9 వరకు ప్రదర్శన అందుబాటులో ఉంటుంది.
