కర్ణాటక అసెంబ్లీ ఎన్నికల ప్రచారం రసవత్తరంగా సాగుతోంది. ప్రధాన మంత్రి నరేంద్ర మోదీ స్వయంగా రంగంలోకి దిగి ప్రచారం నిర్వహిస్తున్నారు. ఇవాళ మోదీ బెంగళూరు సౌత్ నియోజకవర్గంలో 26.5 కిలోమీటర్ల మెగా రోడ్ షో చేపట్టారు. ఇవాళ ఉదయం 10 గంటలకు ప్రారంభమైన రోడ్ షో మధ్యాహ్నం 12.30 గంటల వరకు సాగింది. సోమేశ్వర్ భవన్ నుంచి బెంగళూరు సౌత్లోని మల్లేశ్వర్ సంకి ట్యాంక్ వరకు దాదాపు 26.5 కిలోమీటర్లు ఈ రోడ్ షో సాగింది. ఆదివారం 8 కిలోమీటర్ల మేర మరో రోడ్షో చేపట్టనున్నారు ప్రధాని మోదీ. కెంపెగౌడ విగ్రహం నుంచి ట్రినిటీ సర్కిల్ వరకు సాగనుంది.
నగరంలోని అన్ని ప్రాంతాల్లో పర్యటించి.. ప్రజలను కలుసుకునేందుకు రెండు రోజుల రోడ్ షో పెట్టారని పార్టీ వర్గాలు వెల్లడించాయి. ఒక రోజులో నగరమంతా పర్యటిస్తే.. ప్రజలకు ఇబ్బంది తలెత్తే అవకాశం ఉన్న నేపథ్యంలో ఈ నిర్ణయం తీసుకున్నట్లు వివరించాయి. నగరంలోని సంబంధిత అధికారులతో సమన్వయం చేసుకుని ప్రజలకు ఎలాంటి ఇబ్బందులు తలెత్తకుండా ఏర్పాట్లు చేశామని బీజేపీ ఎలక్షన్ నిర్వహణ కమిటీ కన్వీనర్ శోభా కరంద్లాజే చెప్పారు.
