గుజరాత్లో అక్టోబర్ 30న బ్రిటిష్ కాలం నాటి వేలాడే మోర్బీ కేబుల్ బ్రిడ్జి కూలిపోయి 135 మంది మరణించిన ఘటనపై ఆ రాష్ట్ర హైకోర్టు సుమోటోగా విచారణ చేపట్టింది. ఈ మేరకు రాష్ట్ర ప్రభుత్వానికి, స్థానిక అధికారులకు నోటీసులు జారీ చేసింది. నవంబర్ 14 లోపు ఈ విషయంపై స్థితి నివేదిక సమర్పించాలని ఆదేశించింది.
చీఫ్ జస్టిస్ అరవింద్ కుమార్, జస్టిస్ అశుతోష్ శాస్త్రితో కూడిన డివిజన్ బెంచ్ ఈ నోటీసులను ప్రధాన కార్యదర్శి, రాష్ట్ర హోం శాఖ, మున్సిపాలిటీల కమిషనర్, మోర్బీ మున్సిపాలిటీ, జిల్లా కలెక్టర్కు జారీ చేసింది. వచ్చే సోమవారం నాటికి ప్రధాన కార్యదర్శి, హోం సెక్రటరీ నివేదిక సమర్పించాలని సూచించింది. రాష్ట్ర మానవ హక్కుల కమిషన్ కూడా నవంబర్ 14 లోపు ఈ విషయంపై నివేదికను దాఖలు చేయాలని ఆదేశించింది.
ఈ బ్రిడ్జి కూలిన ఘటనలో ఇప్పటికే 135 మంది మరణించిన సంగతి తెలిసిందే. గల్లంతైన మరో 100కిపైగా మంది ఆచూకీ ఇప్పటి వరకు లభించలేదు. ప్రభుత్వ వైఫల్యం.. మరమ్మతులు చేసిన కంపెనీ అలసత్వం.. సందర్శకుల నిర్లక్ష్యం ఈ ఘనటకు కారణమని పోలీసులు ప్రాథమికంగా తేల్చారు.
