దేశంలో కరోనా వ్యాప్తి కొనసాగుతున్న నేపథ్యంలో వృద్ధులకు సకాలంలో పింఛను పంపిణీ చేయాలని సంబంధిత అధికారులకు సూచించింది సుప్రీంకోర్టు. అలాగే వృద్ధాశ్రమాల్లో నివసిస్తున్నవారికి పీపీఈ కిట్లు, మాస్క్లు, శానిటైజర్లు అందించాలని తెలిపింది. కేంద్ర మాజీ మంత్రి, సీనియర్ న్యాయవాది అశ్వనీ కుమార్ దాఖలు చేసిన పిటిషన్ను స్వీకరించిన జస్టిస్ అశోక్ భూషణ్ నేతృత్వంలోని ధర్మాసనం ఈ మేరకు వ్యాఖ్యానించింది. దేశంలో కోట్లాది మంది వృద్ధులు కరోనా కారణంగా తలెత్తిన సంక్షోభ కాలంలో తీవ్ర ఇబ్బందులు పడుతున్నారని, వారికి ఈ సమయంలో మాస్క్లు, శానిటైజర్లు, పీపీఈ కిట్లు అవసరం మేరకు అందించాలని దిశానిర్దేశం చేసింది అత్యున్నత న్యాయస్థానం.
కరోనా మహమ్మారి వలన వలస కార్మికులు చాలా ఇబ్బంది పడుతున్నారు. వీరి కష్టాలపై కూడా సుప్రీంకోర్టులో వ్యాజ్యం దాఖలైంది. కానీ అత్యున్నత న్యాయస్థానం ఈ మేరకు దీనిపై ఎలా స్పందిస్తుందో వేచి చూడాల్సిందే మరి.
