మలయాళ నటుడు దుల్కర్‌ సల్మాన్‌, హీరోయిన్ మృణాల్ ఠాకూర్ జంటగా తెలుగులో నటించిన ప్రేమకథా చిత్రం ‘సీతా రామం’. ఈ ప్రేమ కథా చిత్రంలో హీరోహీరోయిన్ల నటనకు సినీప్రేక్షకులు ఫిదా అయిపోయారు. అంతే కాకుండా హిట్ టాక్తో ఈ మూవీ తెలుగురాష్ట్రాల్లో అన్నిచోట్ల మంచి వసూళ్లు సాధించింది. ఇటీవల అమెజాన్ ప్రైమ్లో ఈ సినిమా స్ట్రీమింగ్ అవుతుండగా.. సినిమాను చూసిన నెటిజన్లు సీతారామంపై మనసు పారేసుకుంటున్నారు.
సీతారామం.. ఓ సాధారణ చిత్రంగా విడుదలై ప్రేక్షకుల మదిని కన్నీటితో బరువెక్కించిన మధుర కావ్యం. హను రాఘవపూడి దర్శకుడు. ఇంతకాలం థియేటర్లలో అలరించిన ఈ సినిమా శుక్రవారం నుంచి అమెజాన్ ప్రైమ్ వేదికగా అందుబాటులోకి వచ్చింది. దీంతో ఈ చిత్రాన్ని అభిమానించే వారి సంఖ్య మరింత పెరిగింది. సీతా, రామ్‌గా మృణాల్ ఠాకూర్, దుల్కర్‌ సల్మాన్‌ చెప్పిన ప్రతి మాటా.. పలికించిన ప్రతి భావాన్నీ నెటిజన్లు ఆస్వాదిస్తున్నారు. తమకు నచ్చిన సన్నివేశాలను సోషల్‌మీడియాలో షేర్‌ చేస్తున్నారు.
ముఖ్యంగా.. ‘కనిపిస్తోంది.. కన్నీళ్లతో ఈ ఉత్తరం తడిచిపోవడం.. తుడిచేసుకో.. వినిపిస్తోంది నన్ను తిరిగి రమ్మనే నీ పిలుపు.. నా చుట్టూ ఉన్న నిశ్శబ్దాన్ని చెరిపేస్తోంది’, ‘నెలకి రూ.600 సంపాదించే సైనికుడి కోసం అన్నీ వదిలేసి వచ్చిన మహారాణి.. ఈ జన్మకి ఇక సెలవు’ అనే డైలాగ్స్‌ కన్నీళ్లు పెట్టిస్తున్నాయని నెటిజన్లు పేర్కొంటున్నారు. అద్భుతమైన సంభాషణలు రాసిన హను రాఘవపూడి, జై కృష్ణ, రాజ్‌కుమార్‌ను మెచ్చుకుంటున్నారు.
ఇంటర్వెల్‌ సీన్‌తోపాటు కశ్మీర్‌లో సీతారామ్‌ల మధ్య వచ్చే సన్నివేశాలు అదుర్స్‌ అంటున్నారు. ప్రస్తుతం ఈ చిత్రం అమెజాన్ ప్రైమ్ వేదికగా (ఇండియా) ట్రెండింగ్‌ వన్‌లో ఉంది. వైజయంతి మూవీస్‌ బ్యానర్‌పై సిద్ధమైన ఈ చిత్రాన్ని అశ్వనీ దత్‌ నిర్మించారు. రూ.30 కోట్లతో తెరకెక్కించిన ఈ చిత్రం బాక్సాఫీస్‌ వద్ద రూ.80 కోట్లు వసూళ్లు చేసిందని సినీ విశ్లేషకులు అంచనా వేశారు.
