పార్లమెంట్ రెండో విడత బడ్జెట్ సమావేశాలు ఇవాళ ప్రారంభమయ్యాయి. ప్రారంభమైన కాసేపటికే ఉభయ సభల్లో గందరగోళం తలెత్తింది. ఇటీవల విదేశాలకు వెళ్లిన రాహుల్ గాంధీ అక్కడ చేసిన భారత్ ప్రజాస్వామ్య వ్యాఖ్యలపై కేంద్ర మంత్రి విమర్శలు వ్యక్తం చేశారు. దీంతో కాంగ్రెస్ సభ్యులు నినాదాలు చేస్తూ వెల్లోకి దూసుకెళ్లారు.
పార్లమెంట్ బడ్జెట్ సమావేశాల రెండో విడతలోనూ మొదటి విడతలో జరిగిన సీన్ రిపీట్ అవుతున్నట్లు కనిపిస్తోంది. రాహుల్ గాంధీ విదేశీ టూర్పై కేంద్ర మంత్రి ప్రహ్లద్ జోషి ప్రసంగాన్ని వ్యతిరేకిస్తూ కాంగ్రెస్ నేతలు లోక్సభలో వెల్లోకి దూసుకెళ్లారు. దీంతో సభను మధ్యాహ్నం 2 గంటలకు వాయిదా వేస్తున్నట్లు స్పీకర్ ఓంబిర్లా ప్రకటించారు. మరోవైపు, రాజ్యసభలోనూ అదే పరిస్థితి ఏర్పడింది. దీంతో పెద్దల సభ సైతం మధ్యాహ్నం 2 గంటలకు వాయిదా పడింది.
