నీతి ఆయోగ్ పాలక మండలి సమావేశం ఢిల్లీలో జరిగింది. అయితే ఈ సమావేశానికి ప్రధాని నరేంద్ర మోడీ సహా ఇతర రాష్ట్రాల సీఎంలు, ముఖ్య నేతలు పాల్గొన్నారు. ఈ సందర్భంగా ప్రధాని మోడీ మాట్లాడుతూ.. పంటల వైవిధ్యంపై దృష్టి సారించాలని అన్ని రాష్ట్రాలకు సూచించారు నరేంద్ర మోదీ. నూనె గింజలు (వంటనూనెలు) ఉత్పత్తిలో స్వయం సమృద్ధి సాధించాలని ఆకాంక్షించారు మోదీ. కొవిడ్ సంక్షోభం సమయంలో.. భారత సహకార సమాఖ్యవాదం, సమాఖ్య నిర్మాణం ప్రపంచ దేశాలకే నమూనాగా నిలిచిందని అన్నారు మోదీ. ఢిల్లీ రాష్ట్రపతి భవన్ సాంస్కృతిక కేంద్రంలో మోదీ అధ్యక్షతన జరిగిన భేటీకి పలువురు కేంద్ర మంత్రులు, రాష్ట్రాల ముఖ్యమంత్రులు, కేంద్రపాలిత ప్రాంతాల లెఫ్టినెంట్ గవర్నర్లు హాజరయ్యారు.
సమావేశం ఫలప్రదంగా జరిగిందని అన్నారు నీతి ఆయోగ్ సీఈఓ పరమేశ్వరన్ అయ్యర్. ఎన్ఈపీ 2020, జీ 20, ఎగుమతుల ప్రాధాన్యంపై చర్చ జరిగిందని అన్నారు.కొవిడ్ సమయంలో రాష్ట్రాల మధ్య సహకారం గురించి మోదీ మాట్లాడారని వెల్లడించారు నీతి ఆయోగ్ వైస్ ఛైర్మన్ సుమన్ బేరీ. 2047 లక్ష్యాల గురించి ప్రధాని కీలకంగా మాట్లాడారని పేర్కొన్నారు. నూతన విద్యావిధానంపైనా దాదాపు అన్ని రాష్ట్రాలు ఏకాభిప్రాయంతో ఉన్నాయని అన్నారు నీతి ఆయోగ్ సభ్యులు వీకే పాల్. రాబోయే రోజుల్లో ఇది అమల్లోకి వస్తుందని ఆశాభావం వ్యక్తం చేశారు.పప్పు ధాన్యాల ఉత్పత్తిలో గడిచిన ఐదారేళ్లలో గణనీయమైన పురోగతి సాధించినట్లు నీతి ఆయోగ్ సభ్యుడు రమేశ్ చంద్ వెల్లడించారు.
