తొలి టీ20 ఓటమి నేపథ్యంలో రెండో మ్యాచ్తోనైనా తిరిగి ఫామ్లోకి రావాలనుకున్న టీమ్ఇండియాకు నిరాశే మిగిలింది. సఫారీలు మరోసారి విజృంభించారు. అటు బ్యాటింగ్.. ఇటు బౌలింగ్తో చెలరేగారు. ఫలితంగా టీమ్ఇండియాపై నాలుగు వికెట్ల తేడాతో దక్షిణాఫ్రికా జట్టు విజయం సాధించింది. తొలి టీ20లో టీమిండియా పాలిట డేవిడ్ మిల్లర్, వాన్ డర్ డుసెన్ విలన్లలా పరిణమిస్తే, ఈసారి ఆ పాత్రను వికెట్ కీపర్ హెన్రిచ్ క్లాసెన్ పోషించాడు. రెగ్యులర్ వికెట్ కీపర్ క్వింటన్ డికాక్ గాయపడడంతో జట్టులోకి వచ్చిన క్లాసెన్ కేవలం 46 బంతుల్లోనే 81 పరుగులు చేసి జట్టును గెలుపు ముంగిట నిలిపాడు. క్లాసెన్ స్కోరులో 7 ఫోర్లు, 5 భారీ సిక్సులున్నాయి.
అంతకుముందు కెప్టెన్ టెంబా బవుమా 35 పరుగులు చేయగా, చివర్లో డేవిడ్ మిల్లర్ 20 (నాటౌట్) పరుగులు చేసి గెలుపు లాంఛనాన్ని పూర్తి చేశాడు. భారత్ విసిరిన 149 పరుగుల లక్ష్యాన్ని దక్షిణాఫ్రికా జట్టు 18.2 ఓవర్లలో 6 వికెట్లు కోల్పోయి ఛేదించింది. భారత బౌలర్లలో భువనేశ్వర్ కుమార్ 4 వికెట్లు పడగొట్టగా, చహల్ 1, హర్షల్ పటేల్ 1 వికెట్ తీశారు. ఈ విజయంతో దక్షిణాఫ్రికా జట్టు ఐదు మ్యాచ్ ల సిరీస్ లో 2-0తో ఆధిక్యంలో నిలిచింది. ఇరుజట్ల మధ్య మూడో టీ20 మ్యాచ్ రేపు విశాఖపట్నంలో జరగనుంది.
