ఇటీవల ఏపీలో నిర్వహించిన సచివాలయ ఉద్యోగాల పరీక్ష పేపర్ లీకైందని ఓ ప్రముఖ పత్రిక వార్తలు రాయడం సంచలనం కలిగించిన సంగతి తెలిసిందే. అయితే ఇప్పుడు ఆ వివాదం కొత్త మలుపులు తిరుగుతోంది. ఉద్యోగార్ధుల సమస్య విషయంలోనూ రాజకీయ పార్టీలు కులాల కుంపటి రాజేస్తున్నాయి. ఈ ఉద్యోగ పరీక్షల్లో మొదటి ర్యాంకు సాధించిన అనిత.. ఏపీపీఎస్సీలో ఔట్ సోర్సింగ్ ఉద్యోగిగా పనిచేస్తున్నారని ఆ పత్రిక రాసింది.
ఆ పేపర్ టైప్ చేసింది కూడా ఆమేనని తానే చూసినట్టు రాసుకొచ్చింది. అప్పటి నుంచి రాజకీయ రగడ మొదలైంది. అనితమ్మతో పాటు మరికొందరు ర్యాంకర్లు కూడా రెడ్డిలే అంటూ టీడీపీ నేతలు కులాల రాజకీయం మొదలు పెట్టారు. సోషల్ మీడియాలో ఈ ప్రచారం జోరుగా సాగుతోంది. దీనికి సమాధానం చెప్పాల్సిన వైసీపీ కూడా అదే కార్డుతో పోరాడుతోంది.
బీసీ సామాజిక వర్గానికి చెందిన మహిళకు గ్రామ సచివాలయ ఉద్యోగాల్లో మొదటి ర్యాంక్‌ వస్తే ప్రతిపక్ష నేత చంద్రబాబు,ఎబిఎన్ ,ఆంద్రజజ్యోతి రాధాకృష్ణ తట్టుకోలేకపోతున్నారని ఆ పార్టీ నేతలు ఆరోపించారు. గ్రామ సచివాలయ ఉద్యోగాల పేరుతో ఒకేసారి లక్షా 27 వేల పోస్టులు భర్తీ చేయడం ఒక చరిత్ర అని వైఎస్సార్‌ కాంగ్రెస్‌ పార్టీ నేతలు పేర్కొన్నారు.
రాష్ట్రంలో బీసీలను అణగదొక్కాలని వాళ్లిద్దరూ కంకణం కట్టుకున్నారని , అందుకే బీసీ నేతలను బాడుగ నేతలుగా రాధాకృష్ణ తన పేపర్‌తో పాటు చానెల్‌లో బహిరంగంగానే అభివర్ణించారని వైసీపీ నేతలు మండిపడుతున్నారు. రాష్ట్రంలో చంద్రబాబు తప్ప మరొకరు సీఎం కాకూడదనేది ఆ పత్రికాధిపతి ఉద్దేశమని, పత్రికను అడ్డం పెట్టుకొని అనేక అక్రమాలకు పాల్పడ్డారని ఆగ్రహం వెళ్లగక్కారు. కులాలు, మతాల మధ్య చిచ్చు పెట్టేందుకు ఆ పత్రికాధిపతి ప్రయత్నిస్తున్నారని ఆరోపించారు.
ఇలా చివరకు పరీక్ష పత్రాల లీక్ వ్యవహారం, ర్యాంకుల వ్యవహారంలోనూ కులాల విషయాలు హైలెట్ చేయడం ఏపీ రాజకీయాలకు పరాకాష్టంగా చెప్పుకోవచ్చు.. దేనికైనా కులాన్ని పులిమేయగల ఘనులు మనవాళ్లను దీంతో రుజువైపోయంది. ఇంతకీ ఈ ఫస్ట్ ర్యాంకర్ అనిత బీసీనా, రెడ్డీనా అన్న అంశంపై క్లారిటీ ఇచ్చేదెవరో..?
