తెలంగాణలో గ్రూప్-3 అభ్యర్థులకు రాష్ట్ర పబ్లిక్ సర్వీస్ కమిషన్ కీలక అప్డేట్ అందించింది. నవంబర్ 17, 18 తేదీల్లో జరగనున్న పరీక్షలకు సంబంధించిన షెడ్యూల్ను కమిషన్ విడుదల చేసింది. పరీక్షలకు వారం రోజుల ముందు హాల్ టిక్కెట్లు అందుబాటులో ఉంటాయని పేర్కొంది. వచ్చే నెల 10 నుండి గ్రూప్ 3 హాల్ టికెట్స్ డౌన్ లోడ్ చేసుకునే అవకాశం ఉంది. TSPSC గ్రూప్-3 మోడల్ ఆన్సర్ బుక్లెట్లు అధికారిక వెబ్సైట్ https://websitenew.tspsc.gov.in/లో అందుబాటులో ఉన్నాయని వెల్లడించింది. ఈ నోటిఫికేషన్ ద్వారా మొత్తం 1388 గ్రూప్-3 పోస్టులను భర్తీ చేయనున్నారు. వివరాల్లోకి వెళ్తే, TSPSC గ్రూప్-3 ఉద్యోగ ప్రకటనలో మొదట 1363 పోస్టులతో 2022 డిసెంబర్ 30న నోటిఫికేషన్ విడుదలైంది. తరువాత అదనంగా 13 పోస్టులు చేరడంతో మొత్తం పోస్టుల సంఖ్య 1375కి పెరిగింది.
నీటిపారుదల శాఖ ఈఎన్సీ కార్యాలయంలో 13 జూనియర్ అసిస్టెంట్ పోస్టులు ఖాళీగా ఉన్నాయని గుర్తించడంతో మొత్తం కొలువుల సంఖ్య 1388కి చేరింది. ఈ పోస్టులకు రాష్ట్ర వ్యాప్తంగా దాదాపు 5,36,477 మంది దరఖాస్తు చేశారు. టీజీపీ ఎస్సీ తాజాగా సబ్జెక్టుల వారీగా పరీక్షల షెడ్యూల్ను విడుదల చేసింది, మోడల్ ఆన్సర్ బుక్లెట్లు అధికారిక వెబ్సైట్లో అందుబాటులో ఉన్నాయి. టీజీపీ ఎస్సీ గ్రూప్-3 పరీక్షలో మొత్తం 3 పేపర్లు ఉంటాయి, ఒక్కో పేపరుకు 150 మార్కుల చొప్పున 450 మార్కులకు పరీక్ష నిర్వహించబడుతుంది. ప్రతి పేపరును రాయడానికి రెండున్నర గంటల సమయం ఉంటుంది.
