వామపక్షాల మద్దతుతో ఇటీవల టీఆర్ఎస్ పార్టీ మునుగోడు ఉపఎన్నికలో ఘన విజయం సాధించిన సంగతి తెలిసిందే. అయితే ఈ పార్టీలు ఆ దిశగా ముందుకు సాగే అవకాశాలు కనిపిస్తున్నాయి. భవిష్యత్లోనూ ఈ పొత్తు కొనసాగేలా ఉన్నట్లు తెలుస్తోంది. తాజాగా వామపక్షాల నేతలతో టీఆర్ఎస్ నాయకుల భేటీ ఈ ఊహాగానాలకు మరింత ఊతమిస్తున్నాయి.
అధికార పార్టీ నాయకులు ఎమ్మెల్సీ పల్లా రాజేశ్వర్ రెడ్డి, ప్రభుత్వ విప్, ఎమ్మెల్యే బాల్క సుమన్.. సీపీఐ రాష్ట్ర కార్యాలయానికి వెళ్లారు. మగ్ధుం భవన్లో సీపీఐ రాష్ట్ర కార్యదర్శి కూనంనేని సాంబశివరావు, జాతీయ కార్యవర్గ సభ్యులు చాడ వెంకట్ రెడ్డితో భేటీ అయ్యారు. మునుగోడు ఉపఎన్నిక విజయం తర్వాత సీపీఐ కార్యాలయానికి టీఆర్ఎస్ నేతలు రావటంపై ప్రాధాన్యత నెలకొంది.
ఈ నెల 12న రాష్ట్రానికి ప్రధాని మోదీ వస్తుండగా విభజన సమస్యలపై నిరసన వ్యక్తం చేయాలని వామపక్ష నేతలు నిర్ణయించారు. ఈ క్రమంలోనే టీఆర్ఎస్ నాయకులు సీపీఐ నేతలతో భేటీ కావడం చర్చనీయంగా మారింది. ఉమ్మడి కార్యాచరణతో ముందుకు వెళ్లాలనే టీఆర్ఎస్ నేతలు ప్రతిపాదించినట్లు తెలుస్తోంది.
